Vastelaovendsvierder 2018

Dames en hiere,

Wie de Kanselarijraod medein nao de Vastelaovend bijein kwaom en gewoen e Vastelaovendsleedsje woort vervaange door gewoen e leedsje, woort ‘ns trökgekeke nao ’t bezunder jaor 2018. Al gaw kaome de prach verhaole bove taofel vaan datginnege wat de hiere mèt die drei daog hadde mètgemaak en gezeen hadde.

D’n eine had ‘ne fantastische einzelgänger gezeen, d’n aandere ’n ganse femilie vaan kojts tot rollator en ‘nen derde vertèlde euver die ein gróp vrun die same oonderweeg waore gewees vaan ’t spek mèt ei tot aon ’t lèste glaas beer veur sletingstied. Meh wee noe ’t beste dee Vastelaovend gevierd had, woorte ze ’t neet euver ins.

Al gaw merkde ze tot dao mie nudeg zouw zien um dees importante käös te make.

Um alle indrökke op e rijke te zette, en zelf weer op krachte te kaome, beslote ze um, gans modern, e weekend op retraite te goon. Dus pakde ze ’t vleegmesjien.

Via Bolivia, Botswana en mèt ’nen tössestop in Belsj kwaome ze oet in Friesland. Nao inkel daog gesjaats te höbbe in Thialf zag de verstendegste vaan de Kanselarijraod tot ze welliech toch verkierd zaote. “Hei vinde veer toch geine Vastelaovendsvierder en hei koume veer al gaar neet tot rös”. Daor waore de meininge euver verdeild en al gaw kraoge ze get wäörd. “Laote veer us neet de Zwarte Piet touwspeule” zag de verstendegste, boe op de röstege vaan ‘t stèl ‘n ‘eureka’ momint kraog. “Zwarte Piet, Zwarte Piet? Daor is hei in Friesland nogal get um te doen gewees”, zag heer. Umtot ze ’t toch al kaajd gekrege hadde in ’t sjraw en kaajd Friesland beslote ze nog e paar daog zon draon vas te plakke. Ze pakde ‘t vleegmesjien naor Madrid um Sinterklaos ‘ns um raod te vraoge. Wie dee leve gooje Klaos de Kanselarijraod had veurzeen vaan get Spaonse tapas veurzaog heer hun ouch nog vaan get gooje raod.

“Ming uuch neet in de Zwarte Piete-discussie” zag heer en “gaank hei gaw wied eweg veurtot eine uuch zuut”. En nog veurtot Klaos dat had oetgesproke waore de tickets nao Suriname al gebook. “want dao kinste de lui, in tegestèlling tot Friesland wel verstoon”, zag de groetste vaan ’t stèl.

Wie ze dao in de ierste de bèste kaffee kaome en veer pèls en e sjoes bestèlde, sjrók d’n hospes.. dees taol had heer ieder gehuurd. Dit waor toch Mestreechs?? En al gaw bestoont e gesprek euver al wat die sjoen stad aon de Maos te beeje heet. Wie wis dees gooje maan in ’t wied Suriname dit allemaol, vroog de röstege. “Nouw”, zag d’n hospes; ”dat weit iech vaan mien tant Wies” zag heer. “die kump eder jaor, perceis veer weke veur de Paose, mèt mien aander tantes Wehweh en Gusta nao Mestreech um de lui te beloere, die zien knettergek dao”, zag d’n hospes. “Manslui wie uuch laope daor mèt roed-geel-greun mötskes en de res vaan de lui zien verkleid mèt de mies creatief pekskes”, völde heer nog aon. De verstendege had al gaw in de gate tot ’t hei um Vastelaovend mós goon. En nog veurtot heer ’t wis had d’n hospes tant Wies, Wehweh en Gusta al debei gehaold.

Vol passie vertèlde de vrouwlui euver Mestreech en de Mestreechter Vastelaovend. De puzzelstökskes vele veur de hiere vaan de Kanselarijraod inein. “Dit zien ze!”, zag de röstege en d’n aandere knikde instummend.

Dames en hiere; maag iech uuch veurstèlle aon eus Vastelaovendsvierders vaan ’t jaor 2018; hei kaome ze, gans vaanoet Suriname; tant Wies, tant Wehweh en tant Gusta; eus Surinaamse tantes!!