'T begós allemaol in ’t jaor 1987, um perceis te zien, tijdens ’t inhole van de nuien Hoeglöstegheid in kaffee D’n Ingel, oppe Merret vaan Mestreech. D’n Hoeglöstigheid waors Math Hameleers. Math d’n 2e.
Same späölde ze trompöt in de zate hermenie “De zaten dweil” en later ouch nog in ’t hermenieke “Klop diech ’n eike” en “Zoepe en bloze”.
Zie is ein vaan de bekker Pie van Rooy, de jongste dochter vaan de werme bekker vaan de Ruttesingel. Geer wét wel, dee boe de Tempeleers altied de groete en bezunder lekker toert vaan kriege, op Vastelaovends zaoterdag bij de sleuteleuverdrach in ’t stadhoes. Allebei verkleide ze z'ch toen es groete broedstoert, compleet mèt bougies en ‘n plestik broedspaar op hunne kop. Meinige fotograaf heet ‘ne foto gemaak vaan die twie sjoen roej toerte. En zoe gebäörden ’t tot zie op de veurpagina vaan de Limburger terech kaome. Dee foto, eve tösse door, is ouch later nog gebruuk veur op hun trouwkaart.
Drei kinder höbbe ze: Mirthe, Guy en Ivo. De drei kinder gónge die drei plezerege Vastelaovendsdaog mèt, in ’n zelf gebouwde carnevalskaar. Daoveur woort de aw bolderkaar umgebouwd tot luxe rijjend bèd, boe zelfs gordijne en ‘ne kiekoet op ’t daak neet ontbraok. Die kaar woort daan volgestouwd met Ligakeukskes, sop-stengels en Ranja limmenaad veur de kinder. De Jägermeister, de Port, ‘t beer, zelf gedrejde gehakballe en blökskes awwe kies ginge mèt veur de groete. Zoe kòste zie tot laat in d’n aovend aander lui blieve lammentere en ziech zelf köstelek ammezere.
Allebij bespeule ze ‘n instrumint , de trompöt. Ze gónge op lès bij ‘ne proffessionele zate hermenie dirizjent en ze lierde dao ’t speule van carnevalsleedsjes, loupend in d'n optoch vaan Mestreech. Ze späölde gere hiel hel en hartstikke vals EN hadde daan op ’t late oor in de nach alle väörtan sjeif stoon en groete blaore op de lippe. Valse louch en ’n tekort aon ammezuur zörgde daan veur ‘ne zier geslaagden aovend.
Allebei dinke ze trök aon hun sjieke creaties es doevemèlker, cirk directeur, sjeepskaptein, duvelke, Hongaarse volksdansers, sjeunpootser, tangodanseres, Sumoworsteleers, keuningin, sjaopsherder en gaank zoe nog mer even door.
Um al die plezerege, mer zier zwoer Vastelaovendsdaog, zoonder blessures door te koume, gónge ze door ‘t jaor regelmaotig wielrenne en mountainbike. Zie fietste in ‘n weekend es begeleier mèt bewoeners vaan Radar door de Eifel. En heer waos altied present op de jaorlekse Sportdaag vaan ’t UWV. Verkleid in wielrenpekske, compleet mét ‘n paar fietsoonderdeile, kumpste die twie de letste jaoren noe met de vastelaovend dèkser tegen in de binnestad vaan Mestreech. Ze höbbe daan al väöl Limburgse kutebieters en modderege riskante aofdaolinge achter de rögk.
De vastelaovendsvierders vaan 't jaor 2016: CHANTALIA EN ROELOVENDUS, de twie kilometervreters vaan de binnestad vaan eus Mestreech! Of zoe wie me zeet: Chantal en Roel Went van Rooy