Op 16 november 1945 woort in de Momustempel carnevalsvereineging De Tempeleers opgeriech.
Initieatiefnummer waor Frans Thewissen, dee ouch es kretser zitting naom in ’t bestuur. Dat ierste bestuur bestoont wijer oet de hiere dr. Jef Heijdendael (praeses), mr. Herman Kortebos (habsjaar), Bèr Retrae (lid) en Sjo Smeets (lid). Sirremoniemeister waor Léon Schreuder.
De naom “Tempeleers” is oongetwiefeld geliend vaan de gelieknaomege ridderorde die in ’t begin vaan d’n 12de iew in Jeruzalem woort gestiech.
In de notule vaan de opriechtingsvergadering vaan de carnevalsvereineging “De Tempeleers” woort es motief veur de naomkäös allein mer vermeld: “umtot de vereineging zitting heet in d’n awwe Momustempel en neet kint leve zoonder e kloek glaas beer”.
De ganse nao-oorlogse oontwikkeling vaan d’n iewenawwe Mestreechter Vastelaovend dreug dudelek de signatuur vaan de Tempeleersorganisatie, die es zoedaoneg ouch es de verantwoordeleke organisatie veur ’t carnevalsgebäöre door ’t stadsbestuur is erkind.
Mèt respek veur en behaajd vaan de wierdevol traditioneel illeminte oet d’n tied vaan de Momus-sociëteit en zelfs lang daoveur höbbe De Tempeleers vaanaof 1946 oonder dèks zier meujleke umstandeghede aon dee Vastelaovend nui impulse gegeve en dat stök volkscultuur neet allein weite te behawwe, meh ze höbbe nui illeminte draon touwgevoog.
Stiechting De Tempeleers
