De Mestreechter Vastelaovend, dat is e begrip in Mestreech en umstreke. ’t Fies weurt netuurlek aanders gevierd es 100 jaor geleie, meh in essentie geit ’t nog altied um ’tzelfde: e paar daog de boel de boel laote. D’n aonluip nao de carnevalsdaog en de carnevalsdaog zelf stoon bol vaan cultuur en traditie. Dink aon ’t oetrope vaan Zienen Hoegen Hoeglöstegheid en de groete Boonte Störm, meh ouch aon ’t Groet Kinderfies en de KinderVastelaovendsExpositie vaan Mestreechse sjaole in ’t azM.
Al dees eveneminte weure georganiseerd door ’ne gróp vaan miejer es 150 vrijwèllegers die z’ch gere inzètte veur de Mestreechter Vastelaovend. Eus motto is ’t verbinde vaan ‘Plezeer & Sjariteit’door en veur alle lui in Mestreech, mèt speciaol aondach veur de jäög en veur eus awwere.