Jäöghoeglöstegheid
Wie is ’t oontstande?
“t is zjus veur de Coronaperiood, wie veer es Tempeleers bijein zaote euver ’t thema ‘de Jäög heet de touwkoms!’ ’t Is vaan belang dat veer in Mestreech de Vastelaovend leventeg hawwe en dao bij is de jäög cruciaal.
Toen is ’t plan oontstande um ‘ne Jäögprins, -prinses of -koppel vaan Groet Mestreech oet te goon rope. Wie zouwste dit noe goon organisere? Veer zien de gesprekke aongegaange mèt de bestaonde jäögvereineginge en zoe is ’t idee gebore um mèt de (SMV) Jäögvereineginge vaan Mestreech op weeg te goon. De Jäöghoeglöstegheid vaan Groet Mestreech is gebore!
“Veer höbbe dit initiatief vaan de Tempeleers unaniem umermp. Natuurlek veur de aondach veur de jäög, meh ouch umtot ’t hand in hand kin mèt tradities vaan wiekvereineginge”, zeet veurzitter vaan de Jäög-SMV Bart Gorissen.
Aonpak
De Tempeleers selectere eder jaor ‘n jäögvereineging. De prins of prinses vaan die vereineging weurt neet allein prins of prinses vaan die vereineging, mer ouch Jäöghoeglöstegheid vaan Groet Mestreech. Daobij weure de tradities vaan de vereineging in iere gehawwe. Zjus wie de ‘groete’ stadsprins zal de jäögprins gezeuk weure in de versjèllende wieke vaan Mestreech.
“Door eder jaor te wissele steit eder jaor ’n aander jäögvereineging in ‘de pitslamp’”, völt Tempeleers-oetbelder Armand Peereboom aon. “Zoe versterke veer dus de samewèrking mèt de SMV-vereineginge, de Vastelaovend in de wieke en de jäögvastelaovend.”
Deze jong, meidske of koppel zal Mestreech veurgoon in de kindervastelaovend. De Tempeleers veurzien de jäöghoeglöstegheid vaan prinseleke kleiaasj, inclusief prinsekap of tiara, scepter en sjabbeleer. De jäöghoeglöstegheid kreig same mèt ziene eige raod vaan èlf ouch ’n oetgebreider program mèt Vastelaovend. Zoe is heer ieregas op ’t Groet Kinderfies en ’t Jäögprinsetreffe en jurylid bij de Kinderverseerwedstrijd. Peereboom: “Daoneve maag heer of zie de vijfde sjeut vaan ‘t Momuskenon doen, boemèt de Vastelaovend op carnevalszoondag geopend weurt. Es lèste, zal heer of zie de kindervastelaovend aofslete op carnevalsdinsdag.