Vastelaovendsvierder 2013
Air Ordinair
E paar maond veur de Vastelaovend 2005 woort op e zolderkemerke aon de Minckeleersstraot de basis gelag veur ’n nui vleegmaotsjappij. De opriechters zien allemaol nog steeds present.
In de aofgeloupe jaore höbbe zie nui collega’s aongenome en ouch sommege oontslage.
Nao ’n aontal zwangersjapsverlove en zelfs eine sabbatical wie ze e jaor neet höbbe gevloge meh höbbe getennis tijdens de Vastelaovend is ’t noe alweer ’n aontal jaore e vas concep.
Thoesbasis is Kaffee de Belsj. Vaan dao-oet vlege ze mèt Vastelaovend nao de Vriethof en ’t Slevrouweplein.
Ze zeivere en klaoge altied tot ze ouch liever verlof hadde mèt de Vastelaovend; jaomer genóg mote ze daan altied wèrke. En ’t is zwoer huur, de maaks daan ouch vaan al mèt tijdens hun vlöchte.
Twie jaor geleie höbbe zie ’n kaar-crash gehad in de Hoonderstraot tijdens de cortège. ’t Waor ’n ravaasj. Slachofferhölp en e paar pilote höbbe hun vaan hun trauma’s verlos. Aofgeloupe Vastelaovend is hun kaar (nota bene in ’t jaor tot OssKaar prins waor) geklajd.
Allemaol zjeloes concurrente of stewardesse die zie höbbe aofgeweze. Zie hantere naomelek ’n hiel zwoer seleectie-proceduur. De moos get kinne knawwele en haore kinne toupere, aanders hèlt ’t al hiel gaw op.
Nao de Vastelaovend goon ze mèt z’n alle nao d’n orthodontis. Vaan al dat knawwele versjuif de boel soms get. Kaakfractuur, beugelke debij... De moos get euver höbbe veur dit beroop.
Hun favoriete gaste aon boord zien Onno en Albert en netuurlek De Tempeleers.
Zie höbbe nog foto’s vaan e paar nui Tempeleers aon de nui kaar gehaange en laote uuch die foto’s gere zien.
’t Waor hunne groeten druim um oets ’ne kier Vastelaovendsvierder vaan ’t jaor te mage weure.
Ze zien lètterlek en figuurlek in de wolke...
Favoriete bestumminge: Nazareth, Lummel en Blauwdörp;
favoriet vleegmesjien: Airbös 11-11;
favorieten draank: Schultenbräu beer, wie lawwer wie beter;
favotie ete aon boord: friet mèt sajs;
favoriet ete mèt de Vastelaovend: bruudsje weurs vaan d’n Törkse winkel in de Mestreechter Heidestraot;
favoriete meziek aon boord: Beppie - In d’n hiemel;
favoriete taxfree artikele: Sjanel parfum, Flucci zonnebrèlle en tuutsjes poejersókker.
Wat ze es twiede wins höbbe is stewardess bij KLM te weure, ze wachte op ’n tillefeunsje vaan Camiel.
Dames en hiere, mèt plezeer annonceer iech uuch de Vastelaovendsvierder 2013
Sjanel, Destiny, Valentina, Samantha en Latifah.
Oftewel: Air Ordinair