Vastelaovendsvierder 2015
De Mestreechter beeldegróp
’t Begós allemaol mèt de kemediegróp “ Stareleech”. Dao-in späölde Berthie de rol vaan ’t Mooswief. ’n Rol die häör op ’t lief is gesjreve. Ze perbeerde vaanoet die kemediegróp lui te mobilisere um deil te numme aon de Groete Cortège op zoondag en de Femilie-optoch op maondag. Ze voont wieneg animo en dus góng ze op zeuk in häören eige femilie- en kinnesekrink.
Wat ze wouw, waor op stap mèt de vastelaovend, dee häör zoe nej aon ’t hart ligk. Häören Harrie vint ’t wel good, heer góng wel kieke, meh ech viere zaot neet drin. Ze maakde Harrie bröl euver häör idee tot ouch heer zaog tot ‘r hei neet oonderoet kaom. Els woort ingesjakeld en ouch Ine. Same begóste ze aon hun creatie. ‘t Nejmesjien woort vaan de mansart gehaold en Els waor al aon ’t radere. En zoe creëerde ze de pekskes in ’t gries en in ’t zwart. Ouch de pruke en knievele woorte zorgvöldeg oetgezeuk. Harrie waors gans um! En zoe kaome eus bekinde Mestreechtenere obbenuits tot leve. De creaties woorte ummertouw beter.
D‘n eine reep: “Hawt de Geis drin”! Weer eine reep: “Iech maak miech drök, iech wèl nao de Vriefhof trök”. En d’n aandere zag: “Wat weurt mèt miech gedoon? Wèl op de Merret blieve stoon”. En “Hawt miech sjoen, meh dat mote veer same doen!” Mèt ‘ne riechtege sokkel op de pókkel waor gein succes en te lesteg um kaffee in en kaffee oet te goon. Daoneve waor Els lieuw vaan de perroen mèt ‘ne riechtegen eikel boedoor ze väöl oet te lègke had aon de kiekers langs de rót. Al gaw pakde ze ‘ne knievel en Fons Olderdissen waor touwgevoog aon de gróp. Vaanaof deen tied zien ze neet mie weg te dinke oet de Cortège.
‘t Trefpunt is Aajd Caberg, boe ze ziech gezamelek schminke. Dit is ‘n jaorleks trökkierende traditie boebij netuurlek e lekker stök huidvleis en ouch e pèlske en ‘n eelske neet mage oontbreke. Vaan dao-oet vertrèkke ze daan mèt privéchauffeur Leo riechting Wiek nao de opstèlplaots. En es ze genóg blaore geloupe höbbe, weure ze weer opgehaold door dee gouwe.Thoes gekoume weurt onder e lekker gleeske d’n daag doorgenome en al gaw oontdèkke ze tot: Minckelers zien vlam oonderweeg vergete is en Olterdisse zien koontfles sjrobbeleer leeg gezope heet, ‘t Mooswief häöre körf gepik en leeg gegete is! De geis gief ‘n pats op die koont en alles kump toch edere kier weer good en zie höbbe weer ‘nen houp plezeer gehad. Eder jaor kriege veer hiel leuke reacties en treffe väöl gezellege lui, tot in China touw. Veer hope dit jaor veur d’n 10e kier same op weeg te goon es de gezoondheid 't toúw liet.
De Vastelaovendsvierder 2015 zien:
De Mestreechter beeldegróp: Els van Hest, Ien Bokmans-Vermeulen, Berthie Nievergeld-Vermeulen en Harie Nievergeld