Vastelaovendsvierder 2014
Veer motte door
’t Begós allemaol wie ze in 2006 gónge studere. Ze móste ’t sjoen Mestreech verruile veur 't Huillandse Dellef. In ’t ierste jaor kaome ze netjes trök veur de vastelaovend en genote zjus wie eder jaor vaan de sjoen klaanke vaan hermenieke FineFleur. Meh wat ze ’t mieste misde waor de spanning die in Mestreech hingk es ’t vastelaovendssezoen steit te beginne. Um dee zwoere studeertied kepot te kriege kaome ze op ’t idee um d’n technische kinnes die ze hadde opgedoon touw te passe op hun ierste creatie. Op hun kamer van 11 m2 woorte 4 meter hoeg hamele gemaak. Um die pekskes te passe móste ze gebruuk make vaan ’t hoeg trappehoes of ze kóste nao boete. De creativiteit woort mèt d’n daag beter, nao get geerstenaat oet Wielder gónge ze weer aon de geng. ’t Woort sjoender en sjoender meh ouch groeter en hoeger en pas nao ’t lègke vaan de lèste hand aon hun pekske bedachte zie z’ch tot dit gevierte ouch nog oongesjendeleerd nao Mestreech mós. De Fiat 500 waor zjus te krap, wat noe gedoon? Gelökkeg had ein vaan de awwers ’n groete wagel, zoetot ze mer twie keer op en neer hoofde te rije tösse Dellef en Mestreech. ’t Waor de bedoeling tot ze die pekskes allein euverdaag gónge drage. Meh de reacties langs de kant waore zoe euverweldegend tot ze ze d’n ierste aovend en nach neet mie oetdoge. Vaanaof die ierste ervaring droge ze de pekskes 3 daog laank. Ouch wie ze e paar jaor later tot bloojens touw drei evermennekes op hunne nek droge. Um ’t vol te hawwe tijdens die zwoer meh plezerege drei daog zien ze in 2012 pepmiddele goon gebruuke in de vörm vaan paracetamol mèt ’n dosering vaan 11 kg. Neet eder jaor waore de pekskes eve succesvol, zoe waore ze ’t twiede jaor pleebeurstel, meh woorte ze toch wel dèks gevraog of ze sigrètte moste veurstèlle. Ouch waor ein vaan hun kauwgumballe-otomate neet bestand tege hun jaorleks bezeuk aon de Bóbbel. Door de werm loch binne spróng de bal kepot en moste zie ein vaan hun väölvöldege spoedripperaties oetveure. Dankzij FineFleur zien ze ondertösse ein vaan de wienege vastelaovendvierders mèt ’n officieel sponsorkontrak. Dat höbbe ze ouch nudig want eeder jaor goon tientalle meters èllentrikpiepe en hoonderde meters ducktape dedoorheen. Weke veur de vastelaovend doen ze aon rèk- en strek-oefeninge, boebij zeker de nekspiere weure getraind. Ze genete eder jaor ’t sjoen fies vaan de betrèkkelekheid. Ouch ein vaan hun tradities is hun pekske verbranne nao de vastelaovend! Want netuurlek wie ze zelf zègke Veer Mote Door!
Geer kint ze es: Hamer, Pleeboys, 11 kg. Paracetamol, Evermenneke, frikandel in e bekske, kauwgumballe-automaat en waspinneke.
Dames en hiere, mèt plezeer annonceer iech de Vastelaovendsvierder 2014:
Daan Robeerst
Maurice van Roosmalen
Ruben Brouwers
oftewel VEER MOTE DOOR!