Vastelaovendsvierder 2012

Benn Stegermann

Dames en hiere,
Gruuts vertèlde veer uuch veureg jaor tot de stads vastelaovendsorganisatie De Tempeleers op modern góng. ’n Inkel oetzundering daogelaote waore veer tot daan touw excellente veurbeelde vaan conservatief gedrag, neetwoer?
Meh noe zien de sociaal media neet mie weg te dinke, ouch neet bij of door us Tempeleers.
Dus noe weurt getwitterd, gefriemeld aon de knupkes vaan de mobiel tillefoons, gepost op Linkedin en netuurlek Feesbook. ’t Virtueel kentoer in de Prinsewagel is daan ouch neet mie weg te dinke. En toch, in euze zeuktoch nao de nuie Vastelaovendsvierder 2012 gónge veer trök nao dee goojen awwen tied!

Es gamin is de vastelaovendvierder gebore en getoge op D'n Aanker (noe de Aw Twiebergerpoort) en heet de vastelaovend mèt de paplepel ingegote gekrege. En wat dee mins ’t aldersjiekste voont waor tot langs de rót van de cortège langen tied luidsprekers woorte opgehaange en dao oet sjalde daan de meziek vaan oonder andere Thei Menten. Geer geluif ’t neet, meh toen góng um èlf oor ’s aoves de meziek oet …
In de jaore daonao woort de straotvastelaovend in Mestreech ummertouw groetser en sjieker. De Tempeleers perbeerde um die bende straoteluipers in ’t gareel te hawwe …
De hads in deen tied, tot oongeveer haverwege de 60-teger jaore nog neet z'n oetgebreide meziekgróppe wie noe. Wie euze vastelaovendsvierder zelf kinder kraog woorte die jung in ’t begin in ’ne verseerde kinderwagel geprop meh al gaw woort zelf ’n kaar ineinfisternöld zoe bitsje vaanaof 1981 totdat die poete neet mie drin pasde. Vaanaof deen tied heet heer toch gaw ’n kaar of 4 gehad.
In 1991 woort daan e wegelke gefabriceerd mèt ’ne grammefoonspeuler en heer góng daomèt aon de geng!
Die luidsprekers vaan toen waor d’n aonzat … en ein van de ierste neet-vastelaovendsleedsjes die heer drejde waor dat vaan Queen 'We Will Rock You" … en dat waor bij de zate hermeniekes e geweldeg succes en mèt naome bij de trommelere.
Meh mèt deen eine platespeuler dat marsjeerde niet zoe good en dus góng heer nog eine debij plaotse met ’n heus mingpaniel en micrefoon … geer kint uuch wel veurstèlle wat door dat dingk al is gezoonge en gezag gewoorde … !
Nao good 11 jaor waor euze vastelaovendsvierder veerdeg mèt deen aandere meziek en is toen begós mèt allein nog mer vastelaovendsleedsjes te drejje. Vaanoet deen tied heet heer zelfs 78-toere sjellak grammefoonplate. ’n Week veur de vastelaovend vaan 2011 kraog heer ’n e-mailke mèt bijlaog boe de ganse versie vaan "Nog mer ’ns draon" en "Verkespu" stoont.
Dees perelkes vaan leedsjes woorte obbenuits op de grammefoon gepeers en zoe kint geer dus vaanaof vastelaovend 2012 dees leedsjes in de orgineel versie, op de SteineBrögk, aonvraoge en beluustere.
Dees grammefoonplaat is daan ouch geduip es ’n hommaasj aon ’t Duo Bex/Menten meh bovenal opgedrage aon zien Gerda.

Dames en hiere mèt plezeer annonceer iech uuch de Vastelaovendsvierder 2012: Benn Stegermann es “D’n diskjockey vaan de SteineBrögk”