Vastelaovend

Ze kinne z'ch al vaan de Basissjaol en vaan de voetbalclub. Dao ontstoonden al de echte vrundsjappe. Ze goon zelfs samen op vekantie, oonder andere nao Salou, Kos, Mallorca en Kreta. In Kreta hadde ze ouch 'ne leuken tied: zoe goejde ze eine vaan de gróp in 't water, boedoor ederein in de buurt vaan 't zwumbad in paniek raakde. De persoen in kwestie kaom lankzaam bove drieve, speide get water oet, terwijl de res de groetste lol had! Es ze op stap ginge spookde ze venalles oet, meh wel op 'n ordenteleke meneer. Vastelaovend is altied hiel bezunder veur hun. Sinds de ieuwwisseling goon ze eder jaor in 'n aander thema verkleid nao de hierezitting. Vaanaof 2015 wèlde ze get spesjaols doen, en dao ging hiel get wèrk aon veuraof. Meh tijdens 't make vaan de nui creaties höbbe ze weer hiel väöl plezeer en weurt d'r hiel get aofgelache! In 2015 waore ze verkleid es SUPERMAAN: ze hadde zelfs 'ne vlegende supermaan! 2016 Mós nóg spesjaoler weurde: ze woorte SNEEUWWITJE EN DE DERTIEN DWERGE. Ze hadden hun creatie zóe gemaak es-of Sneeuwwitje éch in de glaze kis laog! Toen kaom 2017: 't mós opnui beter weurde en de veurgaonde jaore euvertreffe! Umtot de hiere fan zien vaan Formule 1 race en vaan euze Limburgse Max, beslote zie um get te make wat hei mét te maken had. Eine vaan de gróp, bijnaom "de Ritz", waos dit jaor Hoeglöstegheid vaan de Sjlaaibök. Toen woort beslote um 't team RITZ BULL RACING TEAM op te riechte. Dit dus es ierbetoen aon  Hoeglöstegheid Stefan Ritzerveld.  D'r woort zelfs 'ne Formule 1 racewagel gemaak, en door 'ne pitstop nao te doen en geliekertied te fèlme, woorte ze binne no time doezende kiere bekeke op de site vaan Dumpert. Zelfs de Telegraaf, Metro, 't AD en SBS 6 sjoonke d'r aondach aon. De groetste verrassing waos 't bezeuk aon de tèllevizieoetzending vaan Staatsloterij Puur Geluk vaan RTL 4. Tijdens deze show woort hun 'n reis nao Monaco aongeboje, boe dat weekind de Formule 1 race plaotsvoond. En 't allersjiekste waos, tot de partners vaan de hiere allemaol mèt mochte! Nao 'ne zwoere, heftegen aovend in 't Franse Cannes, woorte ze 's mörges mèt de bös opgehaold en nao 't Monaco circuit gebrach. Toen ze al laank en breid in de bös zaote, kaome ze d'r achter tot de touwgaangskaarte, ter weerde vaan €7500, nog in 't hotèl laoge!

Leef lui, g'r höb mesjien al geraoje, um wee tot 't dit jaor geit....... De vlegende supermaan, Sneeuwwitje en Max Verstappen heit GLEN! De supermanne, dwerg en crew vaan Max zien zien VRUN! Leef lui, gruuts en mèt väöl plezeer annonceer iech uuch de Vastelaovendsvierders vaan 2017...........   DE GRÓP SUPER-MAAN OET AMIE!!!!!!!!