Vastelaovendsvierder 2008
Prins Gaston I en Adjudant Gilbert
Tijdens de 63ste openbaar jaorvergadering vaan de Tempeleers zien de Vastelaovendsvierders 2008 door vice-prizzedent Jean-Louis Tuinstra aon de verzamelde vergadering bekind gemaak: ’n duo, twie vrun, die het carnavalvierend volk al e paar jaor traktere op ’n bezunder creatie. Naomelek die vaan Prins Gaston I vaan Klein-Ternejje, vaan La Société du Carnaval : "Une avec sajs" en zienen trouwe, prinsewagel-veuroetduienden adjudant Gilbert. In hun act es de Belzje Prins Gaston I en zienen adjudant Gilbert uit Petit-Lanaye laote Ronald Gossieau en Ronald Servais, allebei wonend aon de Peppelhoven in Amie, ederein genete vaan hun kolderieke persiflaasj op ’t prinssjap (dat op ziechzelf netuurlek ouch ’n persiflaaj en e speul is). Ronald Gossieau begós in 1999 mèt de creatie. Toen nog allein en te voot.
Later kaom Ronald Servais es adjudant debij en sinds 2006 maak Gaston I ziene joyeuzen entree in Mestreech in ziene 'Wagel du Prince' (gemaak door Ben Gulikers uit Ittere). Ziechzelf luidkeels aankondegend en visitekeertsjes en boorstplate oetdeilend trèk ’t twietal door de straote, tot groet plezeeer vaan de umstanders. Allebei zien zie vaan keends aof aon carnevalsvierders pur sang en höbbe ’t carneval viere mèt de paplepel ingegote gekrege. De 47-jaorege Ronald Gossieau is wèrkzaom op de aofdeling Juridische ondersteuning vaan de Ope Universiteit en is sinds de opriechting lid vaan Toneelgróp Lummel, boeveur heer ouch tekste vertaolt en bewèrk. Ronald Servais (42) wèrk es verpleegkundege op de kinder intensive care vaan ’t azM. Heer deit wijer aon hardloupe, bouwt decors bij Toneelgroep Lummel en zörg eder jaor veur nui 'aw kloete' veur op de “Wagel du Prince”. Tijdens ’t insjete vaan carneval op carnevalszoondag zal hun es iereteike ’t Momuskenon weure euverhandeg door de stadsprins vaan Mestreech.