‘ne Chauvinis tot in de kis, ’ne rasechte Sjeng en ’ne maan mèt e geweldeg Vastelaovendshart. Harry Coolen (1963) is tijdens de Algemein Jaorvergadering vaan De Tempeleers beneump tot Vastelaovendsvierder vaan ’t Jaor 2026. Vriedag d’n 13de bleek veur häöm ’ne echte gelöksdaag!
Wee kin ’m neet? Harry Coolen steit inmiddels al veerteg jaor op de Mestreechse podia. Es zenger en entertainer heet heer menneg Vastelaovendsvierder weite te ammesere. Väöl Mestreechtenere kinne ’m vaan onder mie De Nachraove, Duo Ammezasie, Joie de Vivre en Duo Anderhalf.
Same mèt Maurice Braeken vörmde heer jaorelaank Duo Ammezasie. ’t Duo wón es oetveurend arties in 1992 ’t Mestreechs Vastelaovendsleedsjeskonkoer (MVK) mèt De Straoteluiper en in 1994 mèt Diech bis ’t Zönneke. In 1996 volgde de euverwinning op ’t Limbörgs Vastelaovendsleedsjeskonkoer (LVK) mèt Drejje. Later vörmde Harry mèt Heidi van der Hoven ’t duo Joie de Vivre, bekind vaan onder mie Hey hallo lekker stök. Zien veertegjaoreg podiumzjubilei weurt op zoondag 6 december gevierd in ’t Atrium.
Al 22 jaor De Piele Hameleers
Ouch op straot is Harry ’n opvallende versjijning. Al 22 jaor trek heer mèt de Vastelaovend verkleid es De Piele Hameleers door Mestreech. Dit personaasj verwijs nao Giel Hameleers (Vastelaovendsvierder 1958), ’n markant stadsfiguur dee in d’n twintigste iew ‘n bezunder handel dreef in de Platielstraot en tijdens ‘t straotfies Petit Paris de rol vaan de Franse politiecommissaris Le Pilain (‘de Piele’) späölde.
Chauvinis tot in de kis
Zien leefde veur Mestreecht geit wijer es meziek en carneval. Harry verzamelt en spaort al wat mèt de stad te make heet, mèt ‘n bezundere veurleefde veur beeldsjes vaan Mestreechse stadsfigure. Zien hoes liekent daodoor wel ‘n klein Mestreechs museum.
’n Traditie vaan zeventeg jaor
De beneuming vaan de Vastelaovendsvierder is dit jaar extra bezunder. Sinds 1956 weurt jaorleks ’ne persoen, duo of gróp oondersjeie veur zien of häör bezundere bijdrage aon de Mestreechter Vastelaovend of eus stad. D’n titel oontstoont es ‘Vastelaovendsgek’ en kraog later de naom Vastelaovendsvierder vaan ’t Jaor.
Harry sjöt de Vastelaovend in!
Op carnevalszoondag 7 februari 2027 weurt Harry officieel geproclameerd tijdens ’t insjete vaan de Vastelaovend. Heer krijg daan ’n miniatuur vaan ’t Momuskanon en maag de negende kanonsjeut losse. Ouch weurt heer opgenome in de Momuskannoneers, de sociëteit vaan alle Vastelaovendsvierders.