Annie Baltussen (1926-2009) waor ein vaan de markantste versjijninge vaan de Mestreechter Vastelaovend. Al vaanaof ‘t begin maakde zij deil oet vaan de Zaate Hermenie “De Aw”. Es einege vrouw tösse de manslui leep zie veurop en greujde ze oet tot ‘t geziech vaan de kompenei.
Door de jaore heen vervölde Annie versjèllende rolle. Vaan ‘t duie vaan ‘n beerkaar en ‘t dragea vaan de rammelezjang tot häör oetindelek handelsmerk: de tamboer-maître. Ind jaorn zeventeg creëerde ze häör bereump gekrosjeerd roed-wit pekske mèt de Mestreechter staar. Daomèt woort zij bekind es ’t Steerke vaan Mestreech. Mèt häör witte pruuk, lere sjouwerkalbas en karakteristieke oetstraoling waor zie jaorelaank ‘n geleefde versjijning in de binnestad.
In 2002 woort ze tijdens de jaorvergadering vaan De Tempeleers totaol verras wie häöre naom woort oetgerope es Vastelaovendsvierder vaan ‘t jaor 2002. De oondersjeiing beteikende väöl veur häör en ze droog d’n titel gruuts.
Tot op hoege leeftied bleef Annie drei daog laank vaan vreug tot laat carneval viere. Pas in 2008 dwong krenkde häör um thoes te blieve. E jaor later strof ze.
Mèt häör trouw, enthousiasme en leefde veur de straotcarneval greujde Annie Baltussen oet tot ‘n oonvergetelek Mestreechs boegbeeld. ‘n Ras-echte vastelaovendsvierster, die veur altied verbooonde blijf mèt De Zaate Hermenie en mèt de staar vaan Mestreech.