Bertie Schuijren (1951) kraog in de Mestreechter Vastelaovend groete bekindheid mèt häör unieke creatie ‘Mèt z’n dreie biste neet allein’, beter bekind es ‘De drei sjotse medamme’. De oersprunk vaan dees bezundere versjijning laog in häör angs veur drökke kaffees. Alllewel ze same mèt häöre maan Frans jaorenlaank kaffees oetbaatte, veulde Bertie ziech in groete meinegte neet op häör gemaak. E tèllevisieoptrejje brach häör op ‘n idee: mèt twie póppe aon ederskant hoofde ze noets mie allein te zien.
Begin jaore negenteg oontstoont de ierste versie vaan de creatie. Op advies vaan Lou Leunissen (vastelaovendsvierder 1959 en 1992) woorte Bertie en häör twie vrun umgetouverd tot Sjotse dames. De complete constructie woort door häörzelf gemaak. ‘t Rizzeltaat waor indrökwekkend, mer neet ech praktisch. Door de verbindinge tösse de drei figure waor normaal loupe bekans oonmeugelek en zelfs e bezeuk aon ‘t toilèt vreug de nudege inventiviteit. Toch bleef Bertie jaor nao jaor trouw aon häör creatie.
In 2001 woorte De Tempeleers geraak door häör originaliteit, doorzèttingsvermoge en leefde veur de straotcarneval. Dat leide tot häör oetverkezing tot Vastelaovendsvierder vaan ‘t jaor. ‘n oondersjeiing die zie gruuts dreug.
Same mèt häöre maan Frans, zelf ‘n bekinde versjijning mèt ziene imposante knievel en sigaar bij de Joenaaitud Meejdzjors Bend, bleef Bertie naw betrokke bij de Mestreechter Vastelaovend. Mèt häör drei Sjotse dames lieverde zij ‘n oonvergeteleke en eigezinnige bijdrage aon de boonte störm vaan kleurrijke figure die de Mestreechse carneval zoe biezunder make.