Begin jaore ’90 oontstoont roond Michel Wevers (1956) en zien vrouw Gisèle ein vaan de mies imposante versjijninge oet de Mestreechter Vastelaovend: De Bataviere. Wat begós mèt 28 deilnummers greujde oet tot ‘ne gróp vaan mie es hoonderd leie, die jaorleks ‘n indrökwekkende kompenei vörmde.
Authenticiteit stoont daobij centraol. Plastic waor taboe. De pekskes woorte gemaak vaan echte, geluurde sjaopsvachte, boevaan ruim negenteg nudeg waore. In de slachterij vaan Michel aon de Ruttensingel woorte mergpiepe oetgekook um kèttele vaan te make en woorte stierenheurens bewèrk veur de helme. Alles gebäörde mèt väöl vakmansjap en ‘n flinke poortie creativiteit. De ierste wagele woorte gebouwd in samewèrking mèt aonnummer Wim Knols, oonderwijl complete decors en kampeminte verreze um ‘t gehiel nog indrökwekkender te make.
De lui loerde eder jaor oet nao de koms vaan de Bataviere. Hunne omvaank, de meziek, de riek verseerde wagele en de karakteristieke pekskes maakde hun tot ‘ne geleefde versjijning. Op ‘t hoegtepunt tèlde de gróp 116 deilnummers en waor zij neet mie weg te dinke oet de Boonte Störm. Es de veurste wagel al de Vriethof bereikde, drejde de lèste vaan de gróp zjus de Groete Staat in.
Ein vaan de mies legendarische mominte oet hun historie späölde ziech aof in ‘t millenniumjaor 2000 aof, wie stadsprins Peter II korten tied woort ‘ontvoerd’. De Bataviere naome de prins, gehiel volges de geis vaan de Vastelaovend, op de sjouwers mèt door de stad, begeleid door meziek en ‘n oetbundege meinegte. Prins Peter II neumde ‘t later zelf ein vaan de sjoenste mominte vaan zie prinssjap: gedrage weure door zien eige stad.
Terech woorte de Bataviere dat jaor daan ouch oetgerope tot Vastelaovendsvierder vaan ‘t jaor.