Stadsvastelaovendsvereineging De Tempeleers kies touwkomstege opvolging huideg Presidium
Stadsvastelaovendsvereineging De Tempeleers maak gruuts bekind tot de touwkomstege opvolging vaan ‘t huideg Presidium is vasgestèld. Per 1 juli 2026 zal Armand Peereboom (42) aontrejje es nuie President vaan de Mestreechter Vastelaovend. Guido Quaden (46) zal vaanaof dat momint de rol vaan Vice-President vervölle. De ceremonieel installatie vint plaots tijdens de openbaar jaorvergadering in november 2026.
‘t Huideg Presidium, bestaonde oet Bastiaan Klomp (President) en Wim Lousberg (Vice-President), dreug sinds 2018 de indverantwoording binne De Tempeleers. Alletwie zien in 2022 herbeneump veur ‘nen twieden termien, die formeel aoflöp op 1 juli 2026. Heimèt höbbe zie de maximaol zittingstermien vaan ach jaor vervöld, conform ‘t rigglemint vaan De Tempeleers dat veurzuut in ‘n standaardtermien vaan veer jaor, mèt ‘n eventueel einmaolege verlenging bij herverkezing.Mèt de beneuming vaan Peereboom en Quaden, aofkomsteg oet de eige geledere vaan de vereneging, weurt ‘nen importante stap gezat in ‘t borge vaan continuïteit en interne krach.
“V’r zien blij en content tot veer es vereineging tijdeg dees opvolging höbbe kinne organisere,” aldus ‘t huideg Presidium. “Dit duo kint de organisatie good en krijg zoe de gelegenheid um ziech op d’n achtergroond grondeg te pripperere op hun touwkomstege rol.”
Armand Peereboom, veurmaoleg Stadsprins vaan Mestreech (2019), is sinds 2021 actief es ‘oetbelder’ (woordvoerder) vaan de vereineging. “Euze Vastelaovendscultuur is neet vaanzelfsprekend. Mèt ruim 35 Tempeleers en circa 150 börgermètwerkers zètte veer us eder jaor vol passie in um dees traditie levend te hawwe. Vastelaovend zörg tot lui, zij ‘t tijdelek, hun zörg vergete en ziech verboonde veule mèt ein en eus stad. ‘n Uniek fenomeen mèt rieke tradities en historie dat noets verlore maag gaon”, aldus Peereboom.
Guido Quaden, Tempeleer sinds 2018, vervölt al ruim 5 jaor ‘t veurzittersjap vaan de financieel kemissie binne De Tempeleers en loert oet nao de nui oetdaging: “De aofgeloupe jaore höbbe veer es vereineging sjieke stappe gezat. ‘t feit tot e nui Presidium vaanoet de intern organisatie kint oontstoon, oonderstriep eus stabiliteit. V’r zien daankbaar veur ‘t vertrouwe en blij tot v’r ruim d’n tied kriege um us op eus touwkomstege rol te pripperere.”
De Tempeleers zètte heimèt weer e steveg en doordach fundament neer veur de touwkoms vaan de Mestreechter Vastelaovend.