Stadscarnevalsvereineging De Tempeleers kint vaanaof 1 juli e nui bestuur.
Bermon Pooters trejt touw es nuie veurzitter vaan de Financieel Kemissie en Rolam Nievergeld es veurzitter vaan de Kanselarijraod, Han van Trier weurt de nuien habsjaar. Ieder woort al bekind tot Armand Peereboom de nuie prizzedent weurt en Guido Quaden de nuie vice-prizzedent.
Pooters volg Quaden op bij de Financieel Kemissie, Nievergeld is d’n opvolger vaan Odin Wijnhoven en Peereboom en Quaden numme de take euver vaan Bastiaan Klomp en Wim Lousberg es nui presidium. Lousberg waor ouch habsjaar ad-interim. Vaan alle geneumde Tempeleers leep de bestuurstermien aof. Kretser Iwan Bruijnzeels en Jos Detisch es veurzitter Eveneminte completere ‘t bestuur. Hunnen termien löp nog.
Bij de plenair vergadering vaan de carnevalsvereineging woort wijer Funs Lodewick beneump tot nuien oetbelder en John Zeguers tot nuie Maréchal-Vunkeleer. D’n oetbelder is de woordveurder vaan de vereineging, de Maréchal-vunkeleer dreug zörg veur ‘t Momuskenon boemèt de Vastelaovend in Mestreech eder jaor weurt ingesjote.
Huidegen oetbelder en touwkomsteg prizzedent Armand Peereboom is gruuts op de invölling vaan de functies: “Bezunder is tot veer veur eder vakkatuur mierdere kandidaote vaanoet de vereineging hadde. Es d’n animo en bereidheid um ’nen extra stap te zètte veur de vereineging en Mestreechter Vastelaovend zoe groet is, is dat wat us betröf ouch e sjoen signaal en complimint nao de ganse vereineging. Mèt dees frisse wissels borge veer de continuïteit vaan al ‘t good werk dat hun veurgengers jaorelaank mèt väöl energie en Mestreechter Geis höbbe verriech. Alle aoftrejjende bestuursleie blieve verboonde aon de vereineging en ‘ne Groete Merci aon hun is zeker op zie plaots!”
De ceremonieel installatie vaan de nui bestuursleie zal plaotsvinde tijdens de algemein en openbaar jaorvergadering op vriedag 13 november aonstaonde.