De zomer löp op z’n ind, en dat beteikent tot bij stadscarnevalsvereiniging De Tempeleers ‘t oug weer lankzaam op de Vastelaovend geriech weurt. En neet mèt de minste opgaof: de zeuktoch nao de stadsprins 2027 geit vaan start. Kins diech ‘m?
Kins diech mesjiens dee eine mins dee de Vastelaovend neet allein viert, mer leef. Bij wee de Mestreechter Geis neet ophèlt op Asselegoonsdag, meh ‘t ganse jaor door in alles wat heer deit te zien is. Iemes die mèt ‘ne lach deure opent, lui bijein bringk en vaan vreemde, vrun maak. ‘ne Ambassadeur vaan Mestreech, met e hart vol humor, wermte en leefde veur zien stad. En vaanzelfsprekend iemes die ‘t Mestreechs sprik wie allein ‘ne echte Mestreechteneer dat kint.
Mesjiens kins diech ‘m. Mesjiens woent heer bij diech um d’n hook, steit heer neve diech bij d’n optoch of kumste ‘m edere week tege in de buurt. Draag ‘m daan mèt volle overtuiging veur es Stadsprins vaan Groet Mestreech. Want sjoener es dit tijdelek amb besteit in Mestreech neet.
Oetbelder Funs Lodewick vaan de Tempeleers: “‘ne Stadsprins hoof neet altied ´t helste geluid te make, meh wel deginnege zien die lui in beweging krijg. Mèt humor, zelfspot en ‘n werm hart wèt heer joonk en aajd mèt te numme, vaan de kleinste Zjeng tot d’n ajdste Mestreechteneer. En ouch ziene partner is dao oonmisbaar in. Want pas same vörme zie dat rapportciefer ‘èlf’ dat de Mestreechter Vastelaovend kleur, wermte en e geziech gief.”
De Tempeleers nuuje ederein um mèt te sjrieve aon ‘t volgend chapiter vaan de Mestreechter Vastelaovend. Draag diene droumkandidaot mèt overtuiging veur. Vertèl wee heer is, wat ‘m bezunder maak en wiezoe zjus heer de Mestreechter Geis beliechaamp. Voog recente foto’s en de nudege kontakgegeves touw. ‘t Veurdrachsformuleer steit op www.tempeleers.nl. Persoensgegeves weure wie vaanzelf neet langer bewaord es nudeg is.
Sommege verhaole mote lankzaam riep weure. Daorum blijf ouch dit jaor ‘t groetste geheim vaan Mestreech good bewaord. Euver veurdrachte weurt neet gesproke en euver d’n oetslaag kin neet gecorrespondeerd weure.
En daan… kump dat benkelek momint boe gans Mestreech evekes d’n aosem inhèlt. Op zoondag 10 jannewarie 2027, um 15.11 oor, op de Merret, weurt ‘Zienen Hoegen Hoeglöstegheid’ oetgerope.