Es ’t Mooswief op dinsdagaovend klokslaag 12 oor weer mèt häör twie kloompe de Vriethof weer aonraak, kiert de rös trök in Mestreech. De stad die 3 daog laank ‘t kloppend hart vaan traditie, meziek en saamhoregheid waor, liekent weer häör alledaogs ritme te hervinde. Dit is ’t begin vaan ’t ‘stèl sezoen’. ’n Periood zoonder optochte, zate hermeniekes of pleine en straote vol zaank en klaank. Maar wee dink tot ’t éch stèl is, verdaolt ziech.
Achter de sjerm weurt naomelek oonverminderd gewèrk. De 33 Tempeleers, same mèt zoe’n 150 betrokke vrijwèllegers, zètte ziech ouch in dees maonde mèt volle touwwijding in veur de pripperatie vaan Vastelaovend 2027. Wat veur de boetewereld ’ne röstegen tied liekent, is intern zjus ’n periood vaan planne, organisere en veuroetdinke.
Dao weurt geëvalueerd: wat góng good, wat kin beter? Nui ideeje kriege vörm en tradities weure zörgvöldeg bewaak. Thema’s weure verkind, programoonderdeile geprippereerd en logistieke processe aongesjerp. Vaan pekskes en decor tot meziek en rótte; eder detail krijg aondach, zoetot astrein alles naodloes samekump.
Oonderwijl Mestreech geneet vaan de lentezon, zomerse drökde en werm aovende aon de Maos, greujt in stèlte alweer get sjoens. Want Vastelaovend leef neet allein in fibberwarie. ’t Leef ’t ganse jaor door, in de harte vaan ’t Vastelaovendvierend Volk vaan Mestreech.
Zoe is ’t stèl sezoen allesbehalve stèl. ’t Is d’n oonziechbare krach achter e fies dat ginneraties verbint en eder jaor obbenuits tot leve kump. Mestreech maak ziech, stepke veur stepke, veerdeg veur Vastelaovend 2027.