Naomes de ministeries vaan geannonceerde- en notificeerde zakes, langloupende zakes en energieke zakes:
Op dees veur Mestreech zier importanten daag in ’t vreuge veurjaor vaan 2000 plus twie kier èlf plus veer, make veurneumde Ministeries mèt väöl vräög bekind tot d’n hier dee wierdeg is bevoonde um Mestreech veur te goon in de zwoer meh plezerege daog vaan Vastelaovend vaanaof noe gekind zal zien es:
Lloyd I, Stadsprins vaan Groet Mestreech. Mèt belump en vaste hand zal heer Mestreech op oonnaovolgbaar wijs veurgoon in de vegilie vaan en de heerleke daog vaan Vastelaovend zelf.
| STADSPRINS Lloyd D’N IERSTE Strategicus Corporaticus – Sportivus Spitsicus – Auxilium Fikus Erfprins van de Panninger Linie in Hier Veldhier vaan ‘t Spitsegilde, mèt Gouwe Staar Joonkhier vaan gepeersde artikele oet vastelaovendsgezètte Groet-adviseur vaan alle flexipele profs Orakel vaan Daalhof en umstreke Veurmaoleg Lienhier vaan ‘t Riek vaan de Heugemse Waterratte en de Kribbebieters Magistraot vaan derde helfte vaan Maestrichter Caupona’s Culinair recensent, mèt Michelinstaar, vaan de Rijaloet Lunch Groet-vlegemepper mèt racket vaan tennis en padelclub Ready Drappocommandant vaan alle Zate Hermeniekes Protecteur vaan de Mestreechter Vastelaovend |
Euze Stadsprins, in ’t börgerleve Lloyd Borgers, is 32 jaor joonk. Heer is getrouwd mèt zien leeftallege Prinses Joëlle Borgers-Ringhs (30 jaor joonk). Zie woene mèt hun twie zäöns Jaxx vaan 3 en Lewis vaan bekans 2 aon de Pestoer Heijnenstraot in Hier. Dao is heer, nao umzwervinge via Daalhof (Apollohof), Heugem (Violabeemd) en De Heeg (Trappendaal), terech gekoume.
Zien middelbare sjaoltied heet Zienen Hoegen Hoeglöstegheid, nao de apekeutelesjaole JF Kennedy in Daalhof en denao Anne Frank in Heugem, aofgerond op Porta Mosana College. Iers in Groonsveld (VMBO) en denao in Hier (Havo). Zienen Hoegen Hoeglöstegheid bleek ’n begenaodeg voetballer en späölde vaanoet de jäög vaan MVV ’n dreital sezoene es profvoetballer in ’t ierste vaan MVV. Tijdens zien voetbalcarrière voolgde heer HBO Management en ondernemerschap via ‘t Da Vinci College en dat heet heer zelfs aofgerund.
Via ‘n paar umzwervinge werk Zienen Hoegen Hoeglöstegheid al 8,5 jaor bij technisch projekbureau Flexprof boe heer es Business Unit Manager WEI (Werktuigbouw, Elektrotechniek en Industrie) zörg tot neet allein commerciële kanse benöt weure, meh ouch processe bewaak weure en financiële rizzeltaote bewaak weure.
Euzen hoeglöstegheid is ‘nen echte gebore en getoge Mestreechteneer. Op sociaol-maotsjappelek vlak is heer al inkele jaore ein vaan de kaaretrekkers vaan de Rijaloetlunch vaan de Tempeleers en is daomèt actief börgermètwerker vaan de Financieel Kemissie. Ouch zörgde heer in ’t verleie, same met ’n gans team, tot de vastelaovendsgezet ‘d’n Tempeleer’ good gevöld kós weure met advertenties. Op sportief vlak deit ZHH nog ummer zien rensjeun aon, voetbalt heer nog wel ‘ns op ’t veld bij RKSV Hier en in de zaol bij ZVV Haozendans. Ouch deit heer aon padel bij Tennis en Padelclub Ready.