Oetroopthema en medaajes vaan Tempeleers bekind:‘Groeten Oonbekinde’ es ’t Perfesserke op oetroopwagel

Prinseorde: ’t Perfesserke
Dit jaor viert Mestreech get bezunders: de Universiteit Mestreech besteit 50 jaor. Vief decennia vaan kinnes, oonderzeuk en slum köp die eus stad e bitteke wijzer maakde. En zègk noe zelf: bij al die wetesjap huurt toch ‘ne perfesser?

Daorum hèt de Prinseorde dit jaor ’t Perfesserke. ‘n Knikoug nao de perfesser dee naodink, oonderzeuk en soms get te deep in zien beuk zit. Meh ouch ’n ierbetoen aon ederein dee Mestreech al 50 jaor laank op de kaart zèt es studentestad. Want Mestreech zoonder studente is Mestreech neet. Dèks knawwele veer euver de studente vaanwege euverlas vaan geluid en/of fietse, meh es ze dao neet zien, is Mestreech ouch mer ‘ne sejje boel.

Op de medaaje steit Sjeng Tans, eine vaan de mètopriechters vaan de UM. En allewel Tans zelf noets Perfesser waor, wèlle de Tempeleers ‘m wel op dees meneer iere. ’n Hommaasj aon de zjubilerende UM! De Groeten Oonbekinde zal daan ouch, geëscorteerd door de Tempeleers, es Perfesser op de wagel stoon.

Tempeleers Orde: De Lomelekriemer
De Tempeleersorde dreug dit jaor de naom De Lomelekriemer, en dat is geine touwval.
In Mestreech besteit de pepierfebrik Sappi al 175 jaor. Al ginneraties laank weurt dao pepier gemaak dat de ganse wereld euvergeit. Vaan sumpel velle tot slum touwpassinge: pepier mèt karakter.

’t Oontwerp vaan de Lommelekriemer op de medaaje is vaan ‘t gelieknaomeg beeld dat langs de Papyrussingel (pepiersoort) in Aajd-Caberg steit. In Aajd-Caberg zien de straotnaome verneump nao alles wat mèt pepierverwèrking te make heet. De höbs dao beveurbeeld de Kalanderdonk (apparaat um pepier glad en glanzend mèt te kriege), of de Filigraandonk (‘ne kunsvörm boe-bij stroke pepier weure opgerold en geploejd tot decoratieve verseringe). Of wat te dinke vaan de Effileursdonk (effileur is ‘n apparaat dat machinaol gesorteerde lommele veur pepierstofbereiing in stökskes snijt), etc.

Vreuger vörmde lomele ein vaan de belaankriekste groondstoffe in de pepierfabrikaasj.
Dees lomele woorte opgehaold door de zoegeneumpde ‘lomelekriemers’, die met kare door de Mestreechse straote lepe en hel veur lomele keekde, die daan veur weineg cent door de lomelekriemer gekoch woorte.

Umtot Mestreech ’n belaankrieke stad is boe ’t pepierfebrik tot eus industrieel erfgood behuurt en dit jaor 175 jaor besteit, voonte de Tempeleers ‘t sjiek um de Tempeleersorde daan ouch aon hun op te drage. De Tempeleersorde De Lomelekriemer is dus ‘n ood aon vakmansjap, doorzèttingsvermoge en Mestreechse arbeidsgruutsegheid. De orde besteit oet de gradaties Ridder (broons) Offeceer (zèlver), Kommandäör (goud) en Groet-Offeceer (goud mèt oonderhaangend illemint). De touwvoging vaan de ‘Groet-Offeceer’ is in de vörm vaan ‘n zeef. De zeef waor essentieel veur ’t verwèrke vaan de ‘lomelepulp’ tot pepier.

D’n demasqué vaan de ‘Groeten Oonbekinde’ zal traditiegetrouw op de Merret plaotsvinde op zoondag 18 jannewarie roond 15.11 oor. Veuraofgaond aon ‘t oetrope is uteraard weer ‘ne fiesteleke optoch dee um 13.22 oor vertrek vaanaof de Statie en ouch vaanaof de Merret weer live op ‘t sjerm kin weure gevolg.