Op dinsdag 10 fibberwarie voont in Theater aon ’t Vriethof ’t allerierste jäögvastelaovendsconzèr vaan PhilZuid plaots. Aon ’t ind vaan de middag genote kinder oet Mestreech same mèt hun (groet)awwers en begeleiers vaan ’n uniek conzèr boe-in meziek en Vastelaovend samekaome. Mèt ’ne volle zaol en 400 verkochte keertsjes waor d’n ierste editie e groet succes.
’t Initiatief oontstoont in 2025, wie Prins Carlo I tijdens ’t jaorleks vastelaovendsconzèr vaan PhilZuid, ziene wins oetspraok veur ’n kindereditie. Deen droum woort werkelekheid daankzij Philzuid en Theater aon ’t Vriethof, mèt oondersteuning vaan De Tempeleers.
’t Conzèr waor speciaol veur alle jäög vaan Mestreech. Artieste wie Nigel Otermans en Lex Uiting naome deze middag ’t jong publiek mèt in de meziek en de Vastelaovend. ’t Jäöghoeglöstëg paar vaan Groet Mestreech, Prins Luciano I en Prinses Faith-Lynn I vaan De Witte Ingelkes, waore ouch aonwezeg mèt hunne raod vaan èlf. Zij mochte ’t orkes dirizjere, wie de Jäög vaan Mestreech ’t bekroende jäögvastelaovendsleedsje ‘Veer geve gaas’ lete hure. Hoegtepunt vaan de middag waor wie Lex Uiting alle kinder in de zaol de buun op reep um same ‘Nao ’t zuuje’ te zinge.
Aajd-Stadsprins Carlo I loert gruuts trök: “Dit waor preceis wat iech had gehoop: ‘ne volle zaol mèt kinder die plezeer höbbe, kinnesmake mèt live meziek én de Vastelaovend beleve. Geweldeg um op dees meneer de traditie vaan same meziek make door te kinne geve.”
De enthousiaste reacties nao afloup laote zien tot dit initiatief raak aon de kern vaan Vastelaovend: same plezeer make. Op de buun en in de zaol kloonk al veurziechteg: “Tot volgend jaar!”
Beloer hei de foto’s vaan ’t Jäögvastelaovendsconzèr en eus ander activiteite en bezeuke.