Gruuts en mèt väöl plezeer proclamere de Tempeleers en Jäög Carnevalsvereineging de Witte Ingelkes ‘t Jäöghoeglösteg paar vaan Groet Mestreech.
| PRINS LUCIANO I 4e Jäögprins vaan Groet Mestreech Jäögprins vaan de Witte Ingelkes 2026 Joonkhier vaan ’t Wittevrouweveld Veurgenger vaan alle voetballerkes op zaoterdag Honorair opper-belke-leller vaan de Börgemeister Nierstraszstraot Vollierd kouwgumknawweleer vaan Sjaan-Noord Gevolmachteg koejong vaan ’t Wittevrouweveld Iervol oeretoeker vaan ’t Prinselek hoeshawwe Hertog vaan alle boetespeulende kinder Liechtend veurgenger vaan ’t Nui Leech Protecteur vaan de Mestreechter Jäögvastelaovend |
| PRINSES FAITH-LYNN I 3e Jäögprinses vaan Groet Mestreech Jäögprinses vaan de Witte Ingelkes 2026 Joonkvrouw vaan ’t Wittevrouweveld Veurgengster vaan alle kinderclojns in Mestreech Oppermoeljaan veur alle boetespeulende kinder Vollierd kouwgumknawweleer vaan Sjaan-Noord Iere knutselprinses vaan de CSN sjaol mèt sjier en pepier Hoffelek pierewètsje vaan de Professor Nypelsstraot Iere-dansmarietsje tösse Greune luiper ern de Geusselt Liechtend veurgengster vaan ’t Nui Leech Protecteur vaan de Mestreechter Jäögvastelaovend |
Luciano I, in ’t börgerleve Luciano Vroegop, zoon vaan Patrick Vroegop en Mireille Stassen, breurke vaan Diego (24) en Timo (19) is 9 jaor joonk en is op 08-07-2016 gebore in Mestreech.
Zien jäögprinselek pelies is bij zien mam thoes op de Burgemeester Nierstraszstraat 20 in Mestreech.
In ‘t daogeleks leve geit de jäöghoeglöstegheid nao sjaol in gròp 6 vaan Kindcentrum de Mosasaurus bij juf Solange en juf Maud. Neve voetbal en rölse mèt zien breurs en pap, hèlt Luciano wel devaan um get oet te spoke en de clojn oet te haange.
Prinses Faith-Lynn I, in ‘t börgerleve Faith-Lynn Tijssens, dochter vaan Roland Tijssens en Saskia Geerkens is ouch 9 jaor joonk en is gebore op 22-12-2016 in Mestreech. Häör jäögprinselek pelies steit op de Professor Nypelsstraat 23 te Mestreech.
In ‘t daogeleks leve geit de prinses nao sjaol in klas OB3 bij CSN locatie Rieksweeg bij juf Annika en juf Inge. Deze moeljaan hèlt de lui gere veur de gek en is gek op danse en knutsele.
Vaanaof noe regere zie euver de Jäögvastelaovend vaan Groet Mestreech en zalle zie de koumende weke, neve of in hermenie mèt de gebrukeleke activiteite vaan JCV de Witte Ingelkes, op ’n aontal belangrieke eveneminte hunne joyeuzen entree make.
Nui dit jaor: Jäögconzèr Philharmonie
Aon ‘t aontal vastelaovendsevenementen specifiek veur de jäög weurt dit jaor ’n bezundere activiteit touwgevoog. Same mèt Philzuid weurt op dinsdag 10 fibberwarie ‘t allerierste Jäög Vastelaovendsconzèr gehawwe. ‘nen Unieke middag vol magie, zaank, humor en netuurlek meziek mèt -boete de Philzuid- oonder mie Lex Uiting en illusionist Nigel Otermans op de buun. ‘t Jäöghoeglösteg koppel zal netuurlek ouch acte de présence geve.
’t Conzèr begint um 17.11 oor, kaarte zien te koup via de website vaan ‘t theater.
“Veer blieve constant op zeuk nao nui illeminte um de jäögvastelaovend nog mie inhaajd te geve. Dat doen veer mèt activiteite en bezeuke door de ganse stad, meh ouch beveurbeeld mèt eveneminte wie ‘t Jäög Vastelaovendsconzèr. Daomèt combinere veer traditie met vernuiing, want dat is boe ’t um geit: de Vastelaovend doorgeve aon nui ginneraties”, zeet Armand Peereboom, oetbelder vaan De Tempeleers.
Aander eveneminte specifiek veur de jäög zien:
| Zaoterdag 24 jannewarie: | Bekindmaking winner Kinderexpositie (MUMC+) |
| Zoondag 25 jannewarie: | ’t Groet Kinderfies (Complex) |
| Zaoterdag 7 fibberwarie: | Jäögprinsetreffe (Sterzaol) |
| Donderdag 12 fibberwarie: | Jäögmachseuverdrach (Stadhoes) |
Jäögsymbool ’t Nui Leech weurt op carnevalszoondag, veuraofgaond aon ’t insjete en in ‘t bijzien vaan de Stadsprins en garderizzjemint de Kachelpiepers, umhoeg geheise aon de gievel vaan ‘t Theater aon ‘t Vriethof. Es op carnevalsdinsdag um 17.00 oor de lèste klaanke vaan ‘t Zate Hermeniekeskonkoer ‘t Vriethof sere, liet ‘t jäögprinsepaar dit symbool weer ceremonieel zakke.
De jäögmachseuverdrach is ouch dit jaor weer via ‘ne livestream te volge en weurt in samewèrking mèt de sjaole gecombineerd mèt ‘n lierzaome activiteit.