Mario Verhoeven (1961) greuje op in ‘t hart vaan Mestreech, in ‘n echte horecafemilie. Via kaffees es ‘t Paradies, de Prins vaan Oranje en later de kaffee vaan ziene noonk Willem Smeets aon de Keersemerret kraog heer al op jonge leeftied ‘t Vastelaovendsvirus te pakke. Orelaank loerde heer vaanoet de vinster nao de veurbijtrekkende hermeniekes en verkleide feesgengers. In 1970 moch heer es originele verkleider zelfs ‘n sjeut vaan ‘t Momuskanon losse.
Jaorelaank maakde Mario de mies oeteinloupende en kleurrieke creaties, iers allein en later same mèt zien femilie. Mèt die creaties woorte versjèllende prijze gewónne. In 2009 kaom dao oonverwach verandering in. Wie zien dochter Michèle veurstèlde um ‘gewoen es Roedkepke’ te goon, maakde collega Katja Biesmans ‘t ierste pekske. Wat es grap begós, greujde oet tot zien handelsmerk.
Sinds toen is Roedkepke neet mie weg te dinke oet de Mestreechse straote. Mario löp mèt de Vastelaovend daogeleks väöle kilometers en weurt euveral herkind. Zien leefde veur de Vastelaovend deilt ‘r gere mèt joonk en aajd, oonder mie via zien werk in ‘t oonderwies en de zörg. Daoneve zóng heer bij Ziesjoem en de Köp en sjreef heer versjèllende leedsjes, boe-oonder ‘t winnende vastelaovendsleedsje Confetti oet 2016.
In 2024 woort her oetgerope tot Vastelaovendsvierder vaan ‘t jaor. ‘n Bekroening veur iemes bij wee, zoewie heer zelf zóng, de confetti veurgood door ‘t blood struimp.