De ‘Pleegzusters Bloodwien’ zien oetgerope tot Vastelaovendsvierder vaan ‘t jaor in 2025.
Dat gebäörde tijdens de algemein en openbaar jaorvergadering vaan Stadsvastelaovendsvereineging De Tempeleers in de Sterzaol aon de Breistraot.
De dames Tonny Mulders en Helma Heuts kroepe al 10 jaor in de act vaan de twie zusters, die mèt de Vastelaovend väöl vierders mèt carnavaleske raod en daod bijstoon. Koumende Vastelaovend viere ze hun 11-jaoreg zjubilei, dat weurt geseerd mèt e kenonsjeut vaan ‘t Momuskenon bij ‘t insjete vaan de Vastelaovend op carnevalszoondag. De ‘sjeut’ is de ier die edere Vastelaovendsvierder vaan ‘t jaor ten deil vèlt. Tonny en Helma kinne ziech al zeker daarteg jaor en gónge jaorelaank in ‘n aander pekske op stap met Vastelaovend. Totdat Tonny tien jaor geleie aon Helma vroog wie ’t mèt häöre maan góng. Häör antwoord waor: Iech veul miech zjus Pleegzuster Bloodwien, boemèt de carnevalsact gebore waor.
Tijdens de jaorvergadering woort wijer trökgeloerd op Vastelaovend 2025 en veuroetgeloerd op koumend jaor, aofsjeid genome vaan aajd-stadsprins Carlo I en woorte ouch twie nui Tempeleers geïnstalleerd: Rolam Nievergeld (stadsprins in 2018) en Roy Gulikers (stadsprins in 2024). Zie zalle ziech same mèt de oondertösse 36 Tempeleers en zoe’n 150 börgermètwerkers inzètte veur de tradities en de vernuiing die hure bij de Vastelaovend in Mestreech.