Nieuws

Topontmoeting Stadsprins Mestreech mèt Stadsprins Venlo

17 februari 2020 Vinlo (2)

Wie goon veer de mach griepe? En wie zörge veer deveur tot Mestreech en Vinlo drei fantastische daog Vastelaovend goon beleve? ’t Waore 2 gespreksoonderwerpe vaan ’n uniek prinselek topeuverlègk vaan Stadsprins Luc II vaan “Groet-Mestreech” en Stadsprins Marcel II vaan ‘Jocus Riék’ Vinlo.

De twie prinse troffe elkaar vendaog bij ‘ne lunch in restaurant Onglet in Wieck boe zie, bijgestande door Prizzedent-Tempeleer Bastiaan Klomp, Joeccius XI Roel Versleijen en ’n hoeg dillegatie vaan Tempeleers en lede vaan Jocus, d’n aonstaonde Vastelaovend bespraoke. Mèt Vinloos börgemeister Antion Scholten en eus börgemeisterse Annemarie Penn-te Strake naome zie daoneve al e veursjoot op de Machseuverdrach.

De oontmoeting is historisch te neume; de lèste kier tot de twie vereineginge elkaar officieel bezeuk höbbe dateert vaan umstreeks 1885. De Tempeleers gónge toen nog door ’t leve es Sósjeteit Momus (1839-1939). Nao d’n oorlog is Sósjeteit Momus euvergegoon in Stadscarnavalsvereineging De Tempeleers. Jocus (opgeriech in 1842) is de ajdste nog bestaonde carnavalsvereineging vaan Nederland. Oondaanks tot de vereineginge elkaar langen tied neet officieel bezeukde, besteit ‘r ‘nen innege band tösse de twie vereineginge.

Neve ’n persoenleke connectie tösse de Vinlose Stadsprins en e lid vaan ’t Tempeleersbestuur, ligk dao ouch ’n symbolische beteikenis aon de oontmoeting. ’t Vinlose Jocus Driespan vaan 2020 dreug op häör möts en hoesorde ‘ne blauwe baand es symbool veur de Maos. De Maos symboliseert heibij de verbindende illeminte tösse de Vinlose wieke en stadsdeile, meh de Maos reik netuurlek wijer. De Maos verbind jummers dörpe en stei die door gans Limbörg, vaan zuid nao noord.

Stadsprins Luc d’n Twiede: “Iech veul miech beveurrech um oonderdeil te mage oetmake vaan dees historische oontmoeting en de verhaole, versjèlle en euvereinkomste tösse de Maosstei te ervare. Mèt dees oontmoeting hoop iech tot v’r same deveur kinne zörge tot de sjieke traditie vaan Vastelaovend in Limbörg doorgegeve kin weure aon touwkomstege ginneraties. ’t Leed ‘Vaan Eijsde tot de Mokerhei’is hei daan ouch vaan touwpassing: same mote veer eus sjouwers oonder de Vastelaovend zètte.”

Oonder touwzeend oug vaan börgemeisterse Annemarie Penn-te Strake en börgemeister Scholten höbbe de Hoeglösteghede- die binnekort de mach euver hun stad in de drei zwower meh plezerege daog euvernumme- ervaringe en tactieke oetgewisseld. Dees oontmoeting belaof in eder geval ‘ne fantastische opmaot te weure veur ’t prachteg volksfies dat euver inkele daog in de provincie losbars.

Terug naar overzicht