Nieuws

Stadsprins 2020 Luc II

27 januari 2020 Temp

De Tempeleers make bekind:
Naomes de ministeries vaan microfonische-, langloupende-, proper- en sjrievende zakes.
Op dizze veur Mestreech zier importanten daag in ’t vreuge veurjaor vaan 2000 plus eine kier èlf plus nege, make veurneumde Ministeries mèt väöl vräög bekind tot d’n hier dee wierdeg is bevoonde um Mestreech veur te goon in de zwoer meh plezerege daog vaan Vastelaovend vaanaof noe gekind zal zien es Luc II, Stadsprins vaan Groet Mestreech 2020. Mèt belump en vaste hand zal heer Mestreech op oonnaovolgbaar wijs veurgoon in de vegilie vaan en de heerleke daog vaan Vastelaovend zelf.
Stadsprins Luc d’n Twiede
Euze Stadsprins, in ’t börgerleve Luc van Lijf, is 40 jaor joonk. Heer is verloof mèt zien leeftallege Prinses Jolien Linssen (34 jaor joonk )en zie woene same mèt hun döchterke Doris (1 jaor) en hoond dee (miestal) luustert naor de naom Henk aon de Meerssenerweeg 267 in Wyckerveld. Dao is heer terech gekoume nao umzwervinge via de Veldstraot in Hier, Wageninge, Glasgow in Schotland,de President Rooseveltlaon, Duitse Poort, Keuningsplein en de Atletenbaon.
In ’t daogeleks leve is Ziene Hoege Hoeglöstegheid mede-eigeneer vaan Van Lijf interieurs (vreuger aon de Hoonderstraot boe noe de Prinsegallerij is). ’t Prinselek werkpalies steit aon Aon de Fremme in Mergraote. Wie ‘nen echte Mestreechter jong, starte heer zien carrière via de apekeutele sjaol aon de Joppenhof um via ’t Euro College ziech te bekwaome in facility management aon de Hoegsjaol Zuyd in Heerle.
Euze hoeglöstegheid is ‘nen echte Mestreechteneer dee ziech op sociaol maotsjappelek vlak verdeenstelek maak es lid vaan de Ron taofel 174, boe heer ziech oonder mie inzèt veur de Duckrace. Daoneve waors heer ein vaan de opriechters en zengers vaan dialekformatie Zoeper en vaan vastelaovendsgezelsjap De Aspergepiepers.

Terug naar overzicht