Nuits

Wäörd prizzedent Vastelaovendsmès in de Annakèrk

16 fibberwarie 2020

Veur de lui die gere nao de Vastelaovendsmès in de Annakèrk hadde wèlle koume, meh dat neet kóste, hei de wäörd wie ze zien oetgesproke door Bastiaan Klomp, prizzedent vaan de Mestreechter Vastelaovend.

VIGILIEZOONDAG VAAN VASTELAOVEND

PREEK IN DE ST. ANNAKÈRK

23 FIBBERWARIE 2020

Hoegen hier Deken, Hoegen Hoeglöstegheid en geer Volk vaan Mestreech,

Veur uuch mienen oprechten daank tot iech vendaog, de vigiliezoondag vaan Vastelaovend, nao aw en gooj traditie same mèt uuch Eucharistie maag viere en zoe astrein mèt de bedelnap maag roond goon. Meh dao höb iech ’t zoe astrein nog euver.

Dees sjieke en inspirerende viering is veur us en mennig Mestreechteneer de opmaot veur de sjoenste daog vaan ’t jaor.
En die daog wèlle veer gere beginne mèt ‘ne groete merci aon Slivvenhier veur dee sjieke Vastelaovend vaan ’t aofgeloupe jaor boe-in veer höbbe mage genete vaan ’t gedeild plezeer, boe-in ziech de riekdom vaan Vastelaovend manifesteert.
Meh tegeliek wèlle veer ouch noe weer bij Slivvenhier op de körf stoete veur obbenuits ‘ne plezerige en sjieke Vastelaovend dee op ’t punt steit te beginne.

Meh veur tot ’t zoe wied is, heet d’n artistieke kant vaan Mestreech ziech in de aofgeloupe weke mèt väöl kleur en väöl hoempapa gemanifesteerd.
In ’t Tempeleersmaggezijn höbbe veer ’t tot noe touw oonbekind talent vaan ’n aontal collega’s magen oontdèkke, die mèt liem- en verfkwaste ‘ne nuie prinsewagel höbbe getouverd boe me geer, uuch en watbleef tege zeet, en boe-op volgende week in de groeten optoch euze Prins zal parere.

Euze Marechal-Vunkeleer heet ’t Momuskanon, diffesiel wie heer is, al e paar kier gekoperpóts, de luip good doorgebloze  en ’t kroet bij zienen aptiek zuver aofgewaog, zoe-tot edere sjeut mèt ‘t zjuste kabaal en wienig fienstöb de Vriethofdoeve de stupe op ’t lief jaog en me tot in de oetheuk vaan Mestreech kin hure tot de Vastelaovend is begonne.
Op dat benkelek momint steit de Vriethof vol mèt doezende verkleiers die in de aofgeloupe weke neet stel höbbe gezete. De zate hermeniekes, die eder hun eige compositie stoon te bloze excellere mèt  hun loepzuver perpeksie, boe-mèt zie op mennig concour e gouwe medaaje mèt lof vaan de zjury aon hunnen drappo hadde kinne spange.

Veur maestro André Rieu geit eindelek ‘nen druim in vervölling es heer op vastelaovendsdinsdag mèt de zate hermeniekes ’t hoegtepunt vaan zien cariërre beleef, die op de Vriethof oonder zien magistraol leiing samesmèlte tot ‘t groet Mestreechs sympfonieorkes.

De klein, meh ouch de groete kinder höbbe de nechskes getèld tot ze nog mooste slaope veurtot ’t zoe wied waor, en zie eindelek dat sjoen pekske mochte aon doen, dat mam, nao eige oontwerp en mèt väöl ingele-gedöld veur häör gouwekes heet inein gefisternöld.
Pa weurt geach de groete rökzak te drage dee oetpölt vaan de bruudsjes, de tute chips, de kartönnekes limmenaat en get pempers, veur ’t geval tot de jongste ’t neet druug hèlt.

’t Allerbelangriekste is evels ’t regele vaan ‘ne babysit veur de aovende. Miestal zien de kinder  nao ‘nen daag springe, wie me zeet kapot-meu, meh néét mèt Vastelaovend.

Daan begint ’t aovendprogram thoes. En wéér mèt chips en limmenaat es ama en ampa koumen oplètte zoetot pa en ma mèt familie en vrun mèt e gerös hart en sjiek verkleid op stap kinne goon.

Alles bijein ’n hiel wiechtege taak boemèt ama en ampa ziech pläötske in d’n hiemel verdene, en es veursjoot dao-op ziechzelf oet ‘n good gevölde ieskas op e kaajd buffèt en ’n haaf bevrore elske mage traktere.

Meh wie groet is mèt die daog de tegestèlling mèt de situatie in o.a. Oeganda.
In dat land weurt geine Vastelaovend ingesjote wie bij us, meh es ’t ziech veur deit wel op lui, op awwers en op kinder.
Dao trèk mèt de Vastelaovend ouch geinen optoch, meh hoegoet ’n percessie vaan ermoojzejjers op de vlög veur geweld en mote kinder, wie klein en joonk ze ouch mage zien, ziech zelf  zien te redde umtot ze ma en pa door geweld of aids höbbe verlore.
‘n Aontal vaan die wijskinder maag nog vaan gelök spreke es ze nog ’n Ama höbbe die in staot is um, zoe good  es ’t geit, de kinder e veilig thoes te beje.
Evels, vaan ermooj en goje wèl allein kin me lestig deile. Dao köpste geine ries veur en kinste de kinder ouch neet mèt e bitteke oonderwies op weeg nao e beter leve helpe.
Umdat veerdeg te kriege is väöl hölp vaan boete nudig. Die hölp kaom o.a. vaan  paoter Wijnand Huijs, ‘ne rasechte Sint Pieteneer, dee ziech mie es veertig jaor mèt ’t lijd vaan dees erm lui heet geoccupeerd.
Door zien werk en leve geïnspireerd is nog neet zoelang geleie in Mestreech de organisatie “Grameer to Grameer” opgeriech, um de Grameers vaan Oeganda bij hun “Ingelewerk” ‘n hellepende hand te beje.
In Mestreech weite veer al hiel lang tot ermooj beklaoge d’n hoonger neet verdrijf. Dao-aon herinnere us al bijnao twie ieuwe laank de gevleugelde wäörd “Plezeer en Sjariteit”.
In de geis vaan dees gevleugelde wäörd dörf iech vaanaof dees plaots  e beroop op uuch te doen um, es zoe astrein ’t körfke langs kump, eur hart te laote spreke, en e stökske vaan eur vastelaovendsplezeer aon de kinder en de ama’s  in Oeganda te sjinke.

In de koumende daog seert eus mojersstad ziech mèt d’n daag mie, mèt ’t roed-geel-greun vaan vastelaovend en weure de ierste symptome vaan de naoderende boonte störm mèt d’n daag mie veulbaar in ’t couplèt:

Vaan noe aof klink de blaosmeziek
Steit kwezel noch de gek te kiek
En reurt ’n stad ziech daag en nach
Klink vräögde in de sjaterlach
Vaan kinder mèt hun snuutsks fien
Die straole en gelökkig zien
En ouch de groetste vreigeleer
Oontdoeit mèt zoeväöl puur plezeer
Bert Beenkens 2000

Mèt de kemissie vaan dees wäörd en d’n daank vaan de erm donders in Oeganda,  wins iech uuch naomens Zienen Hoegen Hoeglöstegheid en zien Tempeleers ‘ne sjieke, ‘ne sjoene en bovenal ‘ne Zaolege Vastelaovend.

Amen!

Bert Beenkens 2020

Trök naor 't euverziech