Nuits

Vastelaovendspakkètte veur de ‘sjariteit’

5 fibberwarie 2021

Ruim 444 gezinne die ‘t neet zoe breid höbbe, weure de koumende daog verblijd mèt e carnevalspakkèt. De pakkètte zien in ‘t kader vaan ‘sjariteit’ door
stadscarnevalsvereneging De Tempeleers in samewèrking mèt ‘n aontal aander carnevalsvereneginge en ‘t Elisabeth Strouvenfonds samegestèld.

Stiechting De Gouwe
15 x 11 Pakkètte (165 pakkètte) zien bedoeld veur Stiechting de Gouwe. Stiechting De Gouwe is ‘n (door professionals geleide) vrijwèllegersorganisatie die lui oet Mestreech en ‘t Heuvelland help die ‘t sociaal economisch lesteg höbbe. Tempeleers-woordvoerder Odin Wijnhoven: “In de pakkètte veur De Gouwe zitte oonder mie keukskes, ballonne, get um te fisternölle en te kleure. Daodoor kinne ouch die gezinne, en mèt naome de kinder, toch get make vaan carneval 2021, dee zoe aanders weurt es aanders.”

Quiet Community Maastricht
Quiet Community Maastricht kint rekene op 222 pakkètte. Versjèllende carnevalsvereneginge oet Mestreech verkochte de aofgeloupe weke pakkètte aon geïnteresseerde. Vaan d’n opbrings vaan de -in totaol- 1111 verkochte pakkètte (oetverkoch!) weure dees 222 pakkètte betaold. Quiet Community Maastricht zèt zich in veur lui in ermooj-situaties in Nederland. Dit verrassingspakkèt bevat get um te ete, get um te verzamele, te versere en um te doen.

Zate Hermeniekes donere aon de Zonnebloem
Mèt d’n opbrings vaan ‘t Zate Hermeniekesconcours 2020 kinne de Tempeleers ouch nog ‘ns 66 pakkètte aonsjaffe en lievere aon De Zonnebloem. Nationale Vereniging de Zonnebloem verriek ‘t leve vaan lui mèt ’n liechameleke beperking en dat vaan häör vrijwèllegers door sociaol en recreatief activiteite meugelek te make.

Plezeer en Sjariteit
Tempeleer Odin Wijnhoven: ” ‘t Devies vaan de Tempeleers is ‘Plezeer & Sjariteit’. Carneval is väöl mie es drei daog fies. ‘t Geit ouch um ‘t umkieke nao lui die ‘t minder gemekelek höbbe, en zeker dit jaor boe-in ‘t fies neet door kint goon vaanwege corona. Door de inspanning vaan ‘t Vastelaovendvierend volk vaan Mestreech en de deilnummende carnevalsvereneginge kinne v’r lui die wel wèlle, meh dat (financieel) neet kinne, toch e bitsje bij carneval betrèkke”.

Trök nao 't euverziech