Nuits

Thema en Tempeleersorde gewijd aon Zate Hermeniekes

27 december 2019 Medaajes

Tempeleers: “Geef eus Zate Hermeniekes de ruimte”
Thema en Tempeleersorde gewijd aon Zate Hermeniekes

Leie vaan stadscarnevalsvereineging De Tempeleers vörme op zoondag 26 jannewarie 2020, veuraofgaond aon ‘t oetrope vaan de Groeten Oonbekinde, ‘n groete Zate Hermenie. Thema vaan De Tempeleers in 2020 is daan ouch ’t Hermenieke. De Groeten Oonbekinde steit es Veendeldreger vaan ‘Zate Hermenie de Bezeiverde Tröt’ op d’n oetroopwage.

Themakäös ‘t Hermenieke

Mèt ‘t thema en de medaajekäös wèlle de Tempeleers aondach vraoge veur alle Zate Hermeniekes die de stad heet. Odin Wijnhoven vaan de Tempeleers: ”Mestreech kint ‘n lang traditie mèt- en is de veurlöper vaan de Zate Hermeniekes in Limburg. De lètste jaore merke v’r spieteggenóg tot de Zate Hermenie in de verdrökking kump door al die geluidsboxe aon carnevalskare en aon de horecagievels. Heidoor kinne de hermeniekes hunne meziek minder good speule. Daodoor zien v’r ‘t aontal hermeniekes aofnumme. Door d’n aondach op de Zate Hermeniekes te lègke, hope v’r tot dao begrip oontsteit tösse alle carnevaliste en tot me de meziek eve zachter zèt of eve oetzèt es dao ‘n zate hermenie aonkump”. De Tempeleers perbere zelf ouch ‘t good veurbeeld te geve en geve hermeniekes tijdens ‘t Zate Hermeniekes Konkours (carnevalsdinsdag) letterlek en figuurlek e podium (mie podia zelfs op versjèllende lokaties).

‘Soppegreun’ iert ’t Mooswief

Neve de Tempeleersorde, die dus de naom ‘’t Hermenieke’ mètkrijg, krijg ouch de Prinsenorde ‘n eige thema mèt. Dit jaor hèt de Prinsenorde ‘Soppegreun’, es hommage aon ’t zjubilerend Mooswief op de Merret. Wijnhoven: “In 1954, 6x11 jaor geleie, heet aajd-stadsprins Jacques I (Chappin) zaoleger ‘t beeld vaan Charles Vos oonthöld. Sindsdien is ‘t Mooswief de Patrones vaan de Mestreechter Vastelaovend. Bij zoe e bezunder zjubilei vinde veer ‘t gepas um eus patrones te iere. Aongezeen in ‘t verleie dèkser de naom vaan ’t Mooswief aon ‘n Prinseorde is verliend (1966 en 2009), voont de kanselarijraod vaan de Tempeleers ‘t gepas um e sjiek traditioneel en dobbelzinneg woord es ‘Soppegreun’ aon de medaaje te geve, mèt de beeltenis vaan ’t Mooswief”.

Trök naor 't euverziech