Nuits

Tempeleers zeuke Stadsprins 2021

28 augustus 2020 Prinsoetrope

Stadscarnevalsvereineging De Tempeleers geit op zeuk nao ‘ne stadsprins veur 2021. Want de vereineging wèlt, mèt inachtnumming vaan de coronariechlijne, aktiviteite organisere roond carneval. De ‘sjariteitsgedachte’ weurt daobij nog belangrieker es aander jaore.

 

Aanders es aander jaore

De Tempeleers beseffe tot carneval in 2021 aanders es aander jaore weurt. “V’r höbbe te make mèt ‘n versjrikkeleke pandemie die ouch in Mestreech heet touwgeslage. V’r wete dus tot ’t neet zoemer e virus is dat v’r kinne negere. Meh v’r dinke ouch tot carneval belangriek cultureel erfgood is, dat zjus wie Keersemes en Paose gevierd zal weure”, zeet oetbelder Odin Wijnhoven.  ‘t Motto vaan De Tempeleers is ‘Plezeer en Sjariteit’. Dat kump nog naodrökkeleker nao väöre koumende ‘Vastelaovend’, zeet Wijnhoven. “Carneval is mie es allein fies en e draankgelag. Noe ‘t ‘Plezeer’ in eus motto minder tot oetveur gebrach kint weure, daan goon v’r us nog mie riechte op ‘Sjariteit’. V’r goon dus trök nao de basis vaan eus bestoon. Euver de zjuste invölling goon v’r us de koumende weke buige, meh eus doel is um veur eder doelgróp get te kinne organisere, passend binne de riechlijne vaan de Riekseuverheid en in euverlègk mèt de gemeinte.” Wijnhoven liet wete tot de vereineging al volop loert nao de invölling. “Veur väöl lui is Vastelaovend e fies vaan ‘de zörg opzij’, vaan ‘nen – in dit geval symbolischen – erm op de sjouwer, en vaan gemeinsjapszin. Zake die zeker in dizze lestegen tied hiel important zien, en die väöl lui tijdelek höbbe motte misse. Daorum wèlle v’r zjus dat e pläötske geve koumend jaor, binne de meugelekhede die daoveur gebooje weure.”

 

Stadsprins

Bij carneval huurt ouch ‘ne stadsprins. De Tempeleers goon daorum ouch veur 2021 op zeuk nao dee persoen dee Mestreech veur wèlt en kin goon tijdens dees speciaol periood. Traditioneel vraoge De Tempeleers daobij de hölp vaan ‘t ‘Vastelaovendvierend Volk vaan Mestreech’. Wijnhoven: “V’r zeuke ‘ne stadsprins dee ziech wèt te profilere in dizze lestegen tied. Iemes dee mood wèt in te spreke en ziech positief wèt te presentere. Iemes dee perfek Mestreechs sprik en ‘nen echte carnevalist is. En iemes dee veural noe de sjariteitsgedachte wèt oet te drage.” De Tempeleers vraoge lui die ‘ne kandidaot veur ouge höbbe um dee veur te drage. Op de website vaan de Tempeleers steit vaanaof 5 september tot en mèt 1 november ‘t aonmelformuleer.

De kins hei 't formuleer downloade!

Trök naor 't euverziech