Nuits

Tempeleers starte carnevalssezoen mèt ech Mestreechs fieske

17 nov 2019

Stadscarnevalsvereineging de Tempeleers opent ‘t Vastelaovendssezoen op zoondag 17 november in de Rebelle aon de Kesselskade mèt ‘n ech Mestreechs fieske. Oonder de neumer ‘Start vaan ’t vijfde sezoen’ is in de veurmaolegen ‘Awwe Stiene’ e fies veur joonk en aajd.

‘Geluusterd nao vierders’

Oetbelder Odin Wijnhoven: “Veurgaonde jaore begóste veer ’t sezoen mèt eus openbaar jaorvergadering. De lèste kiere merkde v’r tot de publieke belangstèlling veur dizzen aovond aofnaom. V’r höbbe vervolgens eus oer te luuster gelag bij de carnevalsvierders. Naotot ouch De11devande11de oet de stad weg góng, kloonk ouch oonder Mestreechse carnevaliste ummertouw mie de roop veur ’n eige fieske veur ‘t gans gezin en alle carnevalsvierders. Me wèl ziech treffe en ’t carnevalsgeveul aonwakkere, zoetot dat tijdens de drei daog, straks in fibberwarie ‘n apotheoos bereik”.

Artieste, quiz, trökblik en Vastelaovendsvierder(s) 2019

Beppie Kraft, Duo X-elle, Ziesjoem, Marvin Rosier, de winners vaan ‘t Mestreechs Vastelaovendleedsje, Zate Hermenie De Batjakkers en netuurlek ‘t Garderizzjemint De Kachelpiepers. De Tempeleers höbbe gekoze veur ‘ne gevarieerde middag boe ’ne ganse struip aon Mestreechse artieste en gezèlschappe optrejt. “Ouch loere v’r nog ‘ns trök op Vastelaovend 2019, weure aajd-stadsprins Armand en zien prinses Kim nog ‘ns in ‘t zönneke gezat en weurt veuroetgeloerd nao carneval 2020.

Um de kennis van de Vastelaovendsvierders te teste (of op peil te kriege) is ‘ne Vastelaovendsquiz. Ein vaan de hoegdepunte vaan de middag is ‘t bekindmake vaan de ‘Vastelaovendsvierder(s)’ vaan ‘t jaor 2019. Ouch weurt e speciaol heukske ingeriech boe kinder kinne speule en ziech laote kinne laote schminke”, zeet Wijnhoven.

De presentatie vaan de middag is in han vaan sirremoniemeister Remy Rousseau.

De ‘Start vaan ‘t vijfde sezoen’ is op zoondag 17 november.

De zaol geit ope um 14.11 oor en ‘t program start um 15.11 oor en doort tot 18.30 oor.

D’n touwgaank is gratis.

Trök naor 't euverziech