Nuits

Tempeleers prizzentere ‘Jäöghoeglöstegheid vaan Groet Mestreech’

18 oktober 2021 Steek

Zienen Hoegen Hoeglostegheid krijg vaanaof Vastelaovend 2022 ‘ne jonge prinseleke collega. Stadscarnavalsvereineging De Tempeleers reup naomelek vaanaof dat vastelaovendssezoen, oonder veurbehajd vaan de daan geldende coronamaotregele, ouch de ‘Jäöghoeglöstegheid vaan Groet Mestreech’ oet.

Dit menneke of meideke zal Mestreech veurgoon in de kindervastelaovend.
Zjus wie de ‘groete’ stadsprins zal de jäögprins gezeuk weure in de versjèllende wieke vaan Mestreech.

De Tempeleers wèrke daoveur same mèt de bestaonde jäögvereineginge vaan de Samewèrkende Mestreechter Vastelaovendvereineginge (SMV). De Tempeleers selectere eder jaor ‘n jäögvereineging. De prins of prinses vaan die vereineging weurt neet allein prins of prinses vaan die vereineging, mer ouch Jäöghoeglöstegheid vaan Groet Mestreech. “Veer höbbe dit initiatief vaan de Tempeleers unaniem umermp. Netuurlek veur de aondach veur de jäög, meh ouch umtot ’t hand in hand kin mèt tradities van wiekvereineginge”, zeet veurzitter vaan de Jäög SMV Bart Gorissen.

 “Door eder jaor te wissele steit eder jaor ’n aander jäögvereineging in ‘de pitslamp’”, völt Tempeleers-oetbelder Armand Peereboom aon. “Zoe versterke veer dus de samewèrking mèt de SMV-vereineginge, de Vastelaovend in de wieke en de jäögvastelaovend.”

De Tempeleers veurzien de jäöghoeglöstegheid vaan prinseleke kleiding, inclusief prinsekap of tiara, scepter en sjabbeleer. De jäöghoeglöstegheid krijg same mèt ziene eige raod vaan èlf ouch ’n oetgebreider program tijdens Vastelaovend. Zoe is heer ieregas op ’t Groet Kinderfies en ’t Jäögprinsetreffe en jurylid bij de Kinderverseerwedstrijd. Peereboom: “Daoneve maag heer of zie de vijfde sjeut vaan ‘t Momuskenon doen, boemèt de Vastelaovend op carnavalszoondag geopend weurt. Es lèste zal heer of zie de kindervastelaovend aofslete op carnavalsdinsdag. Veur dees symbolische aofsleting nuuje veer ederein vaan harte um mèt us mèt te dinke. Creatieve ideeë mage gesjik weure nao info@tempeleers.nl

De Tempeleers zien väöl enthousiasme bij de SMV-vereineginge, zeet Peereboom. “Veer goon dit ouch ech same doen. Dus mèt respek veur de tradities en protocolle vaan de wiekvereineginge, en daoneve ouch ‘n uniek inkiekske in de wereld vaan de stadsprins.”

Trök nao 't euverziech