Nuits

Tempeleers prizzentere “de Knoevel” en “de Straoteveger”

18 jannewarie 2021 2021 Serie

De stadsvastelaovendsvereiniging De Tempeleers heet op zoondag 17 fibberwarie de medaaljes veur 2021 geprizzenteerd. Zoe wie gebrukelek zien ouch veur dit seizoen twie oontwerpe gemaak:
de Prinseorde, dreug es naom “De Knoevel” en de Tempeleersorde “de Straoteveger” in veer gradaties: Ridder, Offeceer, Kommandeur en Groet-Offeceer.

 

De Knoevel

Oondaanks ‘t feit tot dit jaor in Mestreech geine Stadsprins regeert is toch ‘n Prinseorde gemaak.

Thema vaan de door kunstenares Wendy Wasbauer oontworpe medaalje is “de Knoevel”.

Veurzitter vaan de Kanselarijraod Odin Wijnhoven eksplikeert: De Knoevel steit symbool veur alles wat veer door de corona eve neet kinne doen en wat veer allemaol misse. De Knoevel is d’n erm um de sjouwer veur de ginnege dee ‘t in dees tied zwoer heet of zjus get goods heet gedoon um de pijn vaan corona te verzachte, wie de lui in de zörg.

‘t Gemis vaan ‘ne Stadsprins dit jaor waor veur de Tempeleers ‘n extra rije um de Prinseorde in iere te hawwe es symbool vaan hoop, passend bij de Mestreechter Geis dee ummer positief blijf.

 

De Straoteveger

Bij de käös vaan de beeldeneer veur de Tempeleerssorde weurt hiel dèks stèlgestaande bij ‘n importante gebäörtenis. Veur dit jaor heet de Kanselarijraod gekoze veur de straoteveger, ‘n hommage veur de lui vaan ‘t “Stadsbeheer”.

Odin Wijnhoven: ‘t veel us edere kier weer op wie groet op ‘t ind vaan ‘ne vastelaovendsdaag de puinzooi waor, meh wie sjiek de stad, daankzij de lui vaan ‘t stadbeheer, ‘s anderdaogs  weer de bij laog.

Ouch in dees periood vaan corona zörge dees lui tot de drekbek en zwerfvoel netjes weuren opgehaold en de milieuperrons mèt hun brevebösopening eders kier weer proper de bij ligke.

Oet respek daoveur voont me ‘t dit jaor gepas um de hel wèrkers vaan stadsbeheer mèt dees medaalje te iere.

 

Oproop aon ‘t volk vaan Mestreech

Normaal reik de stadsprins vaan Groet-Mestreech de medaaljes persoenlek oet. De Tempeleers goon dat bij hoegoetzundering dit jaor zelf doen. Dit gebäört gans in de geis vaan de coronaregels m.n. wat betröf de veurgesjreven aofstand.

Um te zörge tot de medaaljes op de gooj plaots terech koume weurt ‘t volk vaan Mestreech opgerope um verdeensteleke börgers veur te drage (naom, adres, tèllefoonnommer en de rije veurwat iemand weurt veurgedrage) via sg@tempeleers.nl.

De Kanselarijraod beslis aon de hand vaan die gegevens of iemand al daan neet veur ‘n medaalje in aonmerking kump.

Trök nao 't euverziech