Nuits

Tempeleers op zeuk nao ‘Zienen Hoege Hoeglöstegheid 2022’

10 september 2021 IMG 0381

Nao e jaor boe-in Mestreech de traditionele Vastelaovend mèt al häör facette moos misse, hoop ‘t Vastelaovend vierend volk op e sezoen boe-in weer väöl meugelek is.
Stadscarnevalsvereineging De Tempeleers start vaanoet dat ougpunt daan ouch häör zeuktoch nao de 76ste ‘Hoege Hoeglöstegheid vaan Groet Mestreech’

Wee zal de historie vaan Mestreech ingoon es veurnaomste Vastelaovendspersoen vaan 2022?
Stadscarnevalsvereineging De Tempeleers zeuk ‘nen enthousiaste ‘aonjaoger’ dee d’n harlekijn in eder vaan us deit leve, joonk vaan geis is en euver ‘ne gezónnen dosis humor besjik.
‘nen Aimabele persoen dee sociaolvierdeg is en ziech thoes veult tösse alle soorte Mestreechtenere. Ouch moot ‘Zienen Hoege Hoeglöstegheid’ good kinne umgoon mèt de lach en de traon dee oonlosmakelek is verboonde mèt de Mestreechter Vastelaovend, ziech aontoenbaar good kinne verdutse in ’t Mestreechs dialek en woenechteg zien in Mestreech. Euzen Hoeglöstegheid 2022 is ‘ne carnevalsvierder in hart en nere en besjik uiteraard euver de ‘Mestreechter Geis’.

Of euzen oonvervalste Mestreechter Vastelaovend ouch op de meneer kin doorgoon wie veer dat gere zien, is uiteraard aofhaankelek vaan de daan gellende coronamaotregele, meh veer hawwe dao gere rekening mèt tot alles weer gewoen kin plaotsvinde” zeet oetbelder Armand Peereboom.

Zjus wie veureg jaor wèrke de Tempeleers e roed, geel en greun scenario oet veur ‘t koumende sezoen. De veurbereidinge vaan de Tempeleers zien oondertösse in volle gaank, boe-bij weurt oetgegaange vaan ‘t ‘greune’ scenario. “Veer bereie ’t sezoen veur op ‘greun’, boe-in alle activiteite doorgoon wie veer dat geweend zien. Moch tege deen tied blieke tot ‘t (nog) neet kin, doen veer aonpassinge en sjaole aof nao e geel of roed scenario.

Dink geer te weite wee aon ’t gesjetste profiel voldeit en höb geer euzen druimkandidaot veur ouge? Vul daan veur 11-11-2021 ‘t aonmelformuleer via euze website in en sjik ‘t, mèt ‘n zoe compleet meugeleke motivatie en bij veurkäör veurzeen vaan inkel reprizzentatief foto’s (ouch vaan de eventuele partner) nao Sikkertaris-Ginneraol, Tempeleer Marcel Franssen via sikkertaris-ginneraol@tempeleers.nl

‘t Formuleer kint geer vaanaof vendaog hei downloade.

Trök nao 't euverziech