Nuits

Tempeleers loupe op 17 jannewarie mèt ‘t “Stèl Leech”.

17 jannewarie 2021 Facebook 1610819657304 6756267331909727850

President-Tempeleer Bastiaan Klomp en de veurzitter vaan de Kanselarijraod Odin Wijnhoven loupe in de geis vaan ‘t ‘’Stèl Leech” op zoondag 17 jannewarie vaanaof de Cellebroederskapel aon de Brusselsestraot nao de kapel vaan Slevrouw Sterre der Zee.

Zie doen dat op d’n daag boe-op normaal gesproke de Stadsprins vaan Groet-Mestreech op de Merret zouw weuren oetgerope. Gewaopend mèt e brannend olielempke, boemèt bij Slevrouw e keerske zal weuren aongestoke, weurt gerappeleerd aon al die lui die door de plaog vaan Corona gestorve zien en boe me noedgedwónge in stèlte aofsjeid vaan heet mote numme.

Wijnhoven: Daobij wèlle veer ouch stèlstoon bij al die lui die door de Coronacrissis zwoer getroffe zien, zoe wie de (horeca) oondernummers, de muzikante en neet te vergete de awwere die door groete einzaamheid geplaog weure.

‘t Aajd olielempke is aofkomsteg oet e veldlazaret en wèlt e bitteke leech en wermte bringen in d’n duusteren tied boe-in veer noe leve.

‘t “Stèl Leech” is ‘n idee vaan John Eijssen. Dizzen oondernummer vaan de Cellebroederskapel sjreef al ieder, same mèt ‘n aontal companen, ‘t book “De stilte van Maastricht”. ‘t Book vörmp e tiedsdocumint euver wie corona in Mestreech beleef is. Dit is veur ederein ‘ne bizunderen tied, zeet Wijnhoven, daorum tot veer op dees veur Mestreech zoe wiechtegen daag extra stèl wèlle stoon bij de gevolge vaan corona.

2021 weurt ‘ne memorabele vastelaovend zoonder stadsprins. Dat hadde ouch veer gere aanders gezen, meh ‘t is neet aanders. De Tempeleers prizzentere op 17 jannewarie vaanaof 15.11 ‘n alternatief vastelaovendsprgramma op RTV-Mestreech.

Dees oetzending is daonao ouch via social media en de website vaan de Tempeleers trök te kieke.

Trök nao 't euverziech