Tempeleers lojje 77-jaoreg zjubelei in mèt fiesweekend veur ’t Vastelaovendvierend volk
28 juli 2022
Aonstaonde november steit ’t Vastelaovendvierend volk vaan Mestreech wel ‘n hiele bezunderen aoftrap vaan ’t sezoen te wachte. Op vriedag 18 en zaoterdag 19 november organiseert Stadsvastelaovendsvereineging de Tempeleers ’n uniek en eimaoleg fiesweekend um te viere tot Mestreech al 7x11 jaor häöre ‘oonvervalste Mestreechter Vastelaovend’ viert.
Stadsvastelaovendsvereineging De Tempeleers oontstoont op 16 november 1945 oet de Momussociëteit en gief vaanaof dat momint kleur aon de Mestreechter Vastelaovend.
“Oet respek en woerdering veur euzen oersprunk höbbe veer, neve eus 77-jaoreg bestoon, ouch ‘t 100-jaoreg bestoon vaan de Momussociëteit touwgevoog in eus zjubeleilogo.” zeet oetbelder vaan de Tempeleers, Armand Peereboom.
De Tempeleers organisere de twie fiesaovende speciaol veur ‘t volk vaan Mestreech.
Peereboom: “Es Tempeleers zien veer netuurlek oongenuteg gruuts drop tot veer al 7x11 jaor zörg mage drage veur ‘Zienen Hoegen Hoeglöstegheid’ en de vaste aankermominte vaan deen oonvervalste Mestreechter Vastelaovend, meh wat us betröf is ’t de Mestreechter geis vaan ’t Vastelaovendvierend volk wat euze Vastelaovend zoe uniek maak. Um die 77 jaor ‘plezeer en sjariteit’ te viere, organisere veer veur ’t volk vaan Mestreech ’n uniek en eimaoleg fiesweekend”,
Vriedag 18 november 2022: Leve in de Mommezij!
Leve in de Mommezij, neet allein 't lètterleke leve in eus sjoen stad mèt de Vastelaovend, meh ouch ’t leve wat veer mèt die daog make. V'r zinge, v'r springe, v'r houwe op die kis umtot 't Vastelaovend is en laote v'r dat noe viere door dezen aovend leve te make in de Mommezij.
D'n aovend geit vaan start roond de klok vaan 17:11 in en um de foyer, e hepke ete dat kint g'r zjus wie mèt de Vastelaovend bij de frietkraom. ‘n Zate hermenie späölt die sjoen toene die veer zoe gere hure. ’n Ierste verrassingsoptrejje vreug op d'n aovend kint geer ouch al verwachte.
En speciaol veur dees aovend zalle versjèllende bekinde vastelaovendsvierders vaan de Momuskannoneers aonwezeg zien. En neet zoemer! Dees aovend zalle zie de zjury zien van 'n later te beneume feestvierder(s) van d'n aovend en weurt daomèt de Mommezij Nar of Nare vaan 't Zjubelei Carneval Festival. Wie sjiek is dat!
Boete dat koume ouch nog artieste wie FRANS THEUNISZ, ERWIN, JOHN TANA 'nen houp leve make. En zalle de SHAKIN DJ’s speciaol veur ’t zjubelei 'n oor laank'n grandioos dj-set vol same mèt uuch d'n aovend aofslete. DJ MARVIN zal dn aovend wijer muzikaal opluustere.
Dit wèlt geer netuurlek neet misse, koup gaw eur tickets en komp same mèt us ’t zjubelei viere en LEVE MAKE IN DE MOMMEZIJ!
Zaoterdag 19 november 2022: De Mommezij zjubileert!
Vastelaovendvierend volk vaan Mestreech! Veer allemaol zjubelere!
En dat is wat veer mèt uuch wèlle goon viere.
G'r kint 't wel;
Mèt de vrun op stap vaan 's mörges vreug tot 's aovends laat.
Die lui tegenkoume die ste allein trefs mèt de Vastelaovend.
't Mètzinge mèt dee eine vastaovendsklassieker, erm in erm mèt 'ne gemaskerde persoen boevaanste nog ummertouw neet wèts wee 't is.
’t Oontstoon van nui vrundsjappe, die veur 't leve zien.
Dee verdwaalde toeris oetlègke wat dat geveul vaan Vastelaovend is.
Vrundsjap, plezeer, de lach en ’n traon dao wèlle v'r bij stèlstoon.
Veer numme uuch einen aovend mèt in dat geveul en geer moot us daobij helpe door 't mèt te viere wie veer dat normaal mèt die drei zwoer en plezerege daog doen.
V'r beginne d'n aovend vaanaof 17:11 in de foyer. Dao zal 'n zate hermenie uuch alvas opwerme zoewie ze dat normaal ouch doen!
Vaanaof 19:11 geit de groete zaol ope en komp g'r in ‘ne boonte störm terech vaan prachtege meziek gespäöld door niemes minder es ’t MESTREECHS VASTELAOVENDS ORKEST.
Aofgewisseld mèt d'n tóp vaan Mestreech; niemes minder es BEPPIE, ERWIN, FRANS THEUNISZ EN ZIESJOEM zalle de revue passeren.
Dj Robin Eygelshoven zal d'n aovend wijer muzikaol opluustere.
Kaarte veur de twie eveneminte zien HEI verkriegbaar en bedrage €18,50 per stök per aovend. Veur zoewel de vriedagaovend es de zaoterdagaovend gelt tot d’r maximaol 1000 kaarte besjikbaar zien en tot ’t evenemint georganiseerd weurt oonder veurbehajd vaan eventueel gellende corona veilegheidmaotregele.