Tempeleers en de Sjraveleirkes pakke door mèt ‘Jäöghoeglösteg paar vaan Groet Mestreech’
11 november 2023Jäögvastelaovendsvereineging de Sjraveleirkes heet de ier um in 2024 ‘t ‘Jäöghoeglösteg paar vaan Groet Mestreech’ te levere. Dat is vemiddag bekind gemaak tijdens de finaal vaan de verkezing vaan ‘t Mestreechs Vastelaovendsleedsje 2024 in de Meziekgieterij.
Stadsvastelaovendsvereineging De Tempeleers zètte de succesvolle introductie vaan ‘t jäögkoppel aofgeloupe Vastelaovend door. CV De Kikkers oet Heugem-Randwyck had de primeur, dit jaor goon de Sjraveleirkes oet Hier veur in de jäögvastelaovend vaan Mestreech. Hei kinne leefhöbbers de ludieke ‘Tempeleers TV-reportaasj’ vaan de zeuktoch terökkieke.
“Veer stoon te póppele um ’t joonk leech in Mestreech te laote straole, vaan ‘t Vriethof tot de Merret, in de boetewieke en alle heuk vaan Mestreech. ‘t Jäöghoeglösteg paar vaan Groet Mestreech zal ederein ‘ne griemel op ’t geziech tovere en ouch de lui die ‘t zwoer höbbe weer energie geve. Same mèt De Tempeleers goon veer ‘ne fantastische jäögcarneval devaan make!” zeet Claudia Coenen van de Sjraveleirkes.
De Tempeleers wèrke in de zeuktoch nao ‘t ‘Jäöghoeglösteg paar’ same met de bestaonde jäögvereineginge vaan de ‘Samewèrkende Mestreechter Vastelaovendvereineginge (SMV)’.
Veurzitter vaan de Jäög-SMV Bart Gorissen: “Veer vinde ’t fantastisch tot veer weer same kinne optrekke in dit initiatief. Afgeloupe sezoen heet ’t jäögprinsepaar ‘n enorme impuls gegeve aon de Vastelaovend in de wiek en dat hope veer netuurlek ouch dit jaor weer te bereike. ’t Is vaan belang tot veer mèt mekaar de carneval leveteg hawwe bij de jäög en ouch in de wieke. Daoneve zien veer boetegewoen gruuts tot d’r vemiddag ouch weer e gans nui jäögvastelaovendsleedsje is geprizzenteerd”.
’t Nui jäögvastelaovendsleedsje is hei te beluustere.
’t Jäöghoeglösteg paar krijg same mèt hunnen eige raod vaan èlf ouch ’n oetgebreider program mèt de Vastelaovend. Zoe zien zie ieregas op ’t Groet Kinderfies en ’t Jäögprinsetreffe en jurylid bij de Kinderverseerwedstrijd.
Armand Peereboom vaan de Tempeleers: “Ouch kinne zie ’n eige machseuverdrach en zalle zie ein vaan de ‘sjeut’ vaan ‘t Momuskenon doen, boemèt de Vastelaovend op carnevalszoondag weurt geopend. Es lèste zalle zie de kindervastelaovend op ‘n symbolische wijs aofslete op carnevalsdinsdag”.
De installatie vaan ‘t Jäöghoeglösteg paar vaan Groet Mestreech zal plaotsvinde op zaoterdag 6 jannewarie 2024, ruim ‘n week veuraofgaond aon ’t oetrope vaan Zienen Hoegen Hoeglöstegheid.