Nuits

Tempeleers drage ‘sjariteit’ oet tijdens coronacrisis: "Good gemöts"

7 aprèl 2020 Goodgemots

't Devies vaan de Tempeleers (en iers de Momussósjeteit) luit: ‘Plezeer & Sjariteit’. Bij de Momussósjeteit ute ziech dat in 't oetdeile vaan sop en broed aon de minderbedeilde en de Tempeleers doen dat oonder mie mèt 't organisere vaan carnevalseveneminte veur joonk en aajd. Noe carneval alweer inkel weke achter us ligk en v'r in 'n oonzeker periood zien beland door 't coronavirus, wèlt de stadscarnevalsvereineging extra aondach geve aon 't sjariteitsgeveul. Daorum bringe de Tempeleers, oonder de neumer ‘Good Gemöts’ e magazine oet veur de bewoeners vaan Mestreechse verzörgingshoezer.

De bewoeners vaan de verzörgingshoezer kinne door 't coronavirus gei bezeuk oontvaange, mage neet nao boete en kriege allein nog mer de noedzakeleke hölp. Veur Tempeleer Jan Janssen 't signaal um tot actie euver te goon. Jan Janssen: “Tije es dees doen us ins te mie beseffe tot v'r dao same veurein mote zien. V'r kinne mèt hiel klein signale lui 'n hart oonder de riem steke. Artieste doen dat door vaan boetenaof bewoeners vaan verzörgingshoezer te laote genete vaan optrejjes, veer wèlle dat doen door ze leuke verhaole te laote leze. Zoe heet oonder andere aajd-stadsprins Luc van Lijf e verhaol gemaak, is börgemeister Annemarie Penn in de pen geklomme en oontbreke ouch de verhaolen vaan gouverneur Theo Bovens, deke John Dautzenberg en Beppie Kraft neet. V'r zien begós mèt 8 pagina’s en zitte noe al op 16 pagina's mèt hiel leuke artikele”.

Wèlt g'r 't magazine digitaol beloere en/of downloade?
Dat kint netuurlek ouch: hei klikke.

Trök naor 't euverziech