Nuits

Stadsprins Stefan I

23 jannewarie 2023 Stefan I

Mestreech, 22 fibberwari 2023

De Tempeleers make bekind:

Naomes de ministeries vaan geannonceerde- en notificeerde zakes, langloupende zakes en energieke zakes:  

Op dizze veur Mestreech zier importanten daag in ’t vreuge veurjaor vaan 2000 plus twie kier èlf plus ein, make veurneumde Ministeries mèt väöl vräög bekind tot d’n hier dee wierdeg is bevoonde um Mestreech veur te goon in de zwoer meh plezerege daog vaan Vastelaovend vaanaof noe gekind zal zien es

Stefan I, Stadsprins vaan Groet Mestreech 2023. Mèt belump en vaste hand zal heer Mestreech op oonnaovolgbaar wijs veurgoon in de vegilie vaan en de heerleke daog vaan Vastelaovend zelf.

Stadsprins Stefan d’n Ierste

Euze Stadsprins, in ’t börgerleve Stefan Gybels, is 41 jaor joonk. Heer is getrouwd mèt zien leeftallege Prinses Aimée Gybels- Dejong (42 jaor joonk). Zie woene mèt hun döchter Misja en Sasja en hoond dee (soms) luustert naor de naom Sjo aon de Hierderbrook in Hier. Dao is heer terech gekoume nao umzwervinge via de Bilserbaon, Calvariestraot en Franquinetstraot. Veur zien studie heet Ziene Hoege Hoeglöstegheid tied doorgebrach in Tilburg en Rotterdam.

In ’t daogeleks leve is Ziene Hoege Hoeglöstegheid bestuurs- en communicatieadvisäör bij de gemeinte Mestreech, boe heer de börgemeisterse bijsteit veur advies. ’t Prinselek werkpelies is daan ouch ’n riechteg groet pelies in de vörm vaan ’t Stadhoes op de Merret en ’t stadskentoer op Mosae Forum. Wie ‘nen echte Mestreechter jong, startte heer zien carrière via de apekeutele sjaol aon de Aloysiussjaol aon de Breusselsestraot, um ziech via ’t Trichter College te begeve aon de studie veur journalistiek aon de Hoegsjaol in Tilburg.

Euze hoeglöstegheid is ‘nen echte Mestreechteneer dee ziech op sociaol maotsjappelek vlak verdeenstelek maak veur voetbalclub MVV Mestreech, boe heer bij Veer Zien MVV, ein vaan de bestuurslede is. Weijer is heet börgermètwerker vaan Stadscarnavalsvereiniging de Tempeleers. Daor is heer lid vaan de PR-kemissie. Ouch sjreijf Ziene Hoege Hoeglöstegheid tekste en vastelaovendsleedsjes (winnaar MVK 2021-2022 - ‘De Vastelaovendskis’), is heer bestuurslid bij stiechting Revue aon de Maos en deit heer aon hardloupe en späölt zaolvoetbal bij zaolvoetbalvereiniging ‘De Kilo’ en ‘De Buukskes’.

Naom:                   Gybels
Roopnaom:            Stefan
Gebore:                 29-11-1981
getrouwd:              Aimée Gybels- Dejong
Kinder:                  Misja (13 jaor) en Sasja (10 jaor)
Hoesdier:               Sjo, ‘nen Tibetaanse Terriër (dat is ‘nen hoond)
Woenadres:           Heerderbroek 86, 6227 DB Mestreech
E-mail:                  stefangybels043@gmail.com

Beroop:                 Euze Stadsprins werk es Bestuurs- en Communicatieadvisäör bij de gemeinte Mestreech. De prinses is werkzaam es lierkrach in ’t basisonderwies aon de JF Kennedysjaol in Belfort.

Titulaturen vaan Ziene Hoege Hoeglöstegheid en oetlègk:

Stefan d’n Ierste

Mairemainicus (ZHH is Bestuurs- en Communicatie Advisäör vaan de börgemeisterse) Ex-Peersmuskiticus (väöl lui zalle ZHH kinne es veurmaoleg journalis vaan Daagblaad De Limbörger) Intrasjottericus (ein vaan de hobby’s vaan ZHH is zaolvoetbal)

  • Erfprins vaan de Bilserbaon en kaffee de Barreer
    (heij heet ZHH ziene jäög doorgebrach)

  • Iere-musicalspeuler vaan de Sint Aloysiussjaol
    (ZHH waor ’n begenadeg musicalspeuler op zien apekeutelesjaol)
  • Opgeleide koelekop vaan ’t Trichtercollege
    (hei zaot ZHH op de middelbare sjaol)

  • Opper-Boerekieldreger vaan Kruikestad in greun en oranje
    (ZHH heet ’n poging gedoon um journalistiek oonder de knee te kriege op de hoegsjaol veur journalistiek in Tilburg, in vastelaovendstied umgeduip tot ‘Kruikestad”.)

  • Gelegenheidslogé mèt pen en ink vaan Maosstad Rotjeknor
    (in Rotterdam heet ZHH zien ierste stappe in de journalistiek gezat es verslaaggever veur ’t blaad ‘Metro’ )

  • Gelicenseerd scribent bij Veer Zien MVV en Revue aon de Maos
    (ZHH sjreijf in ziene vrije tied (oonder mie) veur Veer Zien MVV en Revue aon de Maos)

  • Opperspreekstalmeister vaan ’t gemeintelek cirk
    (Oonderdeil vaan ’t werk vaan ZHH bij de gemeinte is peers te woord te stoon)

  • Groet-Kutemasseur vaan Prinseleke vereiniging de Buukskes
    (ZHH is fervent zaolvoetballer vaan oonder mie ‘De Buukskes’)

  • Hoege Zije mèt tuiwke en kettel vaan de Karkol
    (in 2019 waor ZHH veurgenger vaan de kaffeevastelaovendsvereiniging vaan kaffee De Karkol)

  • Drappocommandant vaan alle Zate Hermeniekes

  • Protecteur vaan de Mestreechter Vastelaovend
Trök nao 't euverziech