Nuits

Stadscarnevalsvereineging De Tempeleers bringk hommages in zjubilei-jaor

30 december 2022 20221229 Persbericht Foto Tempeleers Medailles 2023

Stadscarnevalsvereineging De Tempeleers bringk in ’t zjubilei-jaor 2023 mierdere hommages aon belaankrieke speulers binne Mestreech en de Vastelaovend. Dat uut ziech oonder mie in de medaajes veur koumende Vastelaovend. Die drage naomelek de naome ‘De Orde vaan de Komponis’ (Prinsemedaaje) en ‘De Orde vaan d’n Toeker (Tempeleersmedaaje). De Groeten Oonbekinde zal op zoondag 22 jannewarie vermomp es Fons Olterdissen nao de Merret weure gebrach.

Medaajes
De ‘Orde vaan de Komponis’ verwijs nao al die leedjessjrijvers die sinds 1946 Mestreech eder jaor höbbe veurzeen vaan ‘t vastelaovendsleedsje. Zoonder daobij iemes te kort te wèlle doen, wèlle de Tempeleers specifiek Math Niël iere, dee oonder mie leedsjes wie ‘Karneval in Mestreech’, ‘En noe bars de bom’ oet 1951 en de ‘Sjoeboks vaan bij Lena’ op ziene naom heet. Ouch ’t supportersleed ‘Jao, dat is eus MVV’ is vaan de hand vaan Niël. Es hommaasj aon Math Niël is daorum de partituur vaan ’t allerierste officiële vastelaovendsleedsje ‘Karneval in Mestreech’ te zien op de medaaje.

De ‘Orde vaan d’n Toeker’ verwijs nao d’n Otoriteitetoeker, dee jaorleks ‘t stadsbestuur fien  liet wete wat d’r allemaol is misgegaange dat jaor, en tot ’t daorum toch ech beter is de mach aon ‘t volk, in de persoen vaan de Stadsprins, te geve.

De medaajes, ouch noe weer vaan de hand vaan Wendy Wasbauer, kinne dit jaor e roed-wit lintsje vaanwege ’t zjubilei-jaor vaan De Tempeleers. De stadscarnevalsvereineging viert dit jaor 100 jaor Momus en 7x11 jaor De Tempeleers. ’t Kinderknuipke is dit jaor daan ouch veurzeen vaan ‘t zjubileilogo.

Oetrope
Normaal is ‘t thema vaan ’t oetrope vaan de Stadsprins geliek aon ’t thema vaan de Tempeleersmedaaje. Dit jaor is dat aanders. “24 fibberwarie 2023 is de hoonderdste sterfdaag vaan Fons Olterdissen. Dat wouwe veer neet oongemèrk veurbij laote goon”, zeet Armand Peereboom. De Groeten Oonbekinde is verkleid es de bekinde sjrijver vaan oonder mie ‘n aontal Mestreechse  theaterstökke. De Tempeleers beelde dee zoondag figure oet die veustèllinge, boe-oonder Trijn de Begijn en de Kaptein vaan Köpenick, oet.

Trök nao 't euverziech