Nuits

Sirremonie meister staaf nao 77 jaor gereviseerd!

24 jannewarie 2023 Sirremonie Meister Staaf

Al vaanaof ‘t begin in 1946 drage veer es Tempeleers ‘m al mèt; de sirremoniemeisterstaf.

De Sirremoniemeisterstaaf
Dit is ‘n belaankriek oonderdeel in ‘t speul vaan de Mestreechter Vastelaovend. Op ’t momint tot de belkes rinkele kin ‘t zien tot Zienen Hoegen Hoeglöstegheid vaan Groet Mestreech zienen joyeuzen entree maak, of tot gesalueerd weurt es iemes op ’n sjoen wijs weurt gegefilliciteerd en gecoiffeerd veur zien of häör verdeenste aon de Mestreechter Vastelaovend. Nao ‘t signale mèt de staf en “Tempeleers Salut” gerope door de sirremoniemeester saluere de Tempeleers.


Zjubilei extra
Noe veer in ‘t 7x11 zjubileisezoen zitte is nog get extra’s touwgevoog. Vaanaof dit seizoen zal ouch Jäöghoeglöstegheid vaan Groet Mestreech en de Jäögraod een eige Jäögsirremoniemeisterstaaf mèt drage. Deze sirremoniemeisterstaaf is in lijn gebrach mèt ‘n ierste sirremoniemeisterstaaf oet 1946.

De symbole
Este nao de sirremoniemeisterstaaf loers, daan vindste 3 hiel belangrijke symbole:

De Kollefit – d’n dreihokege steun dee oet de keramiekindustrie kump en steit veur de missie vaan de Tempeleers um veur ’n gooj basis te blieve zörge veur de Mestreechter Vastelaovend

De Lach en de Traon – ‘n belaankriek aspect veur carneval is um eve de zörg de zörg te laote. Daorum tot de Stadsprins, oondersteund door de Tempeleers, ouch de nudege bezeukskes bringk.

De Kókkerel -  oftewel de tol um te zörge tot veer es Tempeleers de Vastelaovend in Mestreech leveteg hawwe. 

De sirremoniemeisterstave waore zjus op tied veerdeg voor ‘t vastelaovendssezoen 2022-2023!


‘t Revisieproces
De sirremoniemeisterstaaf oet 1946 waor touw aon ‘n revisie. De Kanselarijraod is op zeuk gegaange en höbbe beeldend kunsteneer Joost Jeuken gevraog of heer deze zouw kinne restaurere. Daoneve höbbe veer de gelegenheid aongegrepe um nog 2 identieke exemplare debij te make, en de ieder geneumde Jäögsirremoniemeisterstaaf.

In de broonsgieterij Art And Craft in Vroenhoven waore de meugelekhede besproke en de verbinding woort gaw gelag. Aon de hand vaan 3D-scantechnieke is ‘ne scan gemaak vaan de staf.
Daoveur mós de staaf tot de lèste sjrouf gehiel oeterin weure gehaold, aon d’n eine kant veur de 3D-scans, aon d’n aandere kant veur de rinnovatie.

De staaf oet 1946 is gerestaureerd en obbenuits veurzeen vaan ‘ne nuie robijnroeje staaf. De gebrukersspore vaan 77 jaor höbbe ‘n ziechbaar spoor vaan slijtage achtergelaote, en deze staaf zal allein nog gebruk weure bij plechtege gelegenhede, umtot ’t zoe kwetsbaar is.

Om de nuie sirremoniemeisterstave ‘n modern uterlek te geve zien de nuie stave veurzeen van ‘ne RVS-staaf in plaots vaan de roeje. En is de nikkele kollefit in euverlègk vervaange door ‘ne broonze. Alle sirremoniemeisterstave zien daoneve veurzeen vaan nuie messing belkes.



’n Woord vaan daank veur de samewèrking mèt Joost Jeuken en de Broonsgieterij Art And Craft oet Vroenhoven (B), eigelek eus Mestreechse stadsbroonsgieterij.

Trök nao 't euverziech