Nuits

Sezoensopening: Ierste optrejje ‘sirremoniemeister’ Georges van Zeijl

28 oktober 2021 Sezoensopening

’t Nui Vastelaovendsleedsje 2022, de installatie vaan vief nui Tempeleers, ‘nen trökblik op ’t memorabel sezoen 2021, de oetverkezing vaan de Vastelaovendsvierder vaan ’t Jaor, versjeie optrejjes én de ‘maidenspeech’ vaan de nuie ‘sirremoniemeister’ Georges van Zeijl.
’t Zien de smakeleke ingrediënte vaan de ‘Opening vaan ’t Vijfde Sezoen’ vaan Stadscarnevalsvereineging De Tempeleers op vriedag 12 november in de Sterzaal aon de Breistraot.

 Vaanaof 19:11 oor is de zaol ope veur publiek, dat gratis de sezoensopening maag bijwoene. Nao e welkom door sjeiend sirremoniemeister Remy Rousseau en e wäördsje vaan President Bastiaan Klomp weurt ’t nui Vastelaovendsleedsje 2022 geprizzenteerd. Iwan Bruijnzeels zal vervolgens weure geïnstalleerd es nuie ‘kretser’, Georges van Zeijl es Tempeleer en nuie ‘sirremoniemeister’. Metein daonao hèlt heer zien ‘maidenspeech’. “Dao loer iech nao oet”, zeet Van Zeijl. “‘t Is bès spannend en gief wel e geveul vaan ‘noe geit ’t gebäöre’!”
Van Zeijl zit al in de veurbereiing op zien taak, al heet heer ziech daobij tot noe touw veural op ‘t ‘otoriteitetoeke’ geriech. “Dat is ‘n sjieke oetdaging. Iech höb mèt Jan Janssen euver zien ervaringe gesproke, en al ‘ns mèt de börgemeisterse e bitsje aofgetas. Wat veur geveul iech daobij had? Dat dao al hiel väöl is um te ‘toeke’. Iech zou de polletiek daan ouch wèlle vraoge um veural neet te verslappe.” Veur de sezoensopening is Van Zeijl ouch volop bezeg. “Iech bin dao nog neet gans oet wat iech zjus gaon doen. Iech höb dao oontzèttend väöl zin in. Zeker umtot iech daan eindelek ‘de möts’ op maag. Al is die wel nog väöls te nui huur, meh die zal de koumende jaore oongetwiefeld nog genóg goon ‘lije’.”

 Nao ‘t debuut vaan Van Zeijl zien dao optrejjes vaan Angelina, De Köp en Duo-X Elle en weurt trökgeloerd op ‘t bizaar sezoen 2021. John Albertz, Sjors Bonnemayer, Bermon Pooters en Armand Peereboom weure geïnstalleerd es Tempeleers en es lèste weurt de Vastelaovendsvierder vaan ’t Jaor bekind gemaak. Oetbelder Armand Peereboom: “V’r höbbe e sjiek program boemèt v’r ‘t Vijfde Sezoen op ‘n passende wijs kinne opene. Laote v’r allemaol hope tot die opening e vervolg krijg mèt ‘ne manjefieke Vastelaovend 2022!”

 Bij d’n entree weurt de gaste gevraog um ‘t ‘Greun leech veur de Vastelaovend’ te stimulere middels ‘n geldege QR-code of pepèrre coronatouwgaanksbewies.

Trök nao 't euverziech