Nuien Tempeleer: Remco Frederix
16 oktober 2023
Miene naom is Remco Frederix, 47 jaor joonk, en bekans 2x11 jaor gelökkeg getrouwd mèt Edith. Same zien veer de gruutse awwers vaan Meike en Jeu. Bij eus thoes bin iech d’n einegste dee noets es Prins of Prinses de Vastelaovend heet mage veur goon, meh wel d’n ierste dee noe gevraog is um touw te trejje bij de Mestreechter Vastelaovendsvereineging De Tempeleers.
In ‘t daogeleks leve wèrk iech es manager bij de aofdeiling Klinische Genetica vaan ‘t hospitaol in Mestreech. Boete voetbal, es supporter bij MVV, meh ouch es trainer bij RKHSV, besteie veer väöl tied aon ‘t genete vaan ‘t bourgondisch leve in Mestreech en umstreke. Dao nump de Vastelaovend ouch e groet deil vaan in. Vastelaovend viere veer altied same mèt kinder en vrun, en dao koume dit jaor de Tempeleers bij!
Nao ‘n aontal jaor es börgermètwèrker bij ‘t Boetegebäöre, woort iech gevraog um oonderdeil te weure vaan dees manjefieke club, iech bin daan ouch verierd um op dees meneer mien bijdrage te kinne lievere aon de sjieke en sjoen tradities vaan eus stad en euze Vastelaovend.