Nuien Tempeleer: Funs Lodewick
9 oktober 2023
‘nen Oprechte salut!
Iech bin Funs Lodewick, al hiel lang same mèt Joanne mèt in ‘t hart vaan eus leve, dansend mèt de zachte bries vaan avontuur, eus dochters Emi en Lune. Gruuts es nuien Tempeleer um d’n droum vaan de Vastelaovend bij ederein te kinne bringe. Deen oonvervalsde Mestreechter Vastelaovend is wie ‘n betouverende reis door d’n tied, boe traditie en vernuiing hand-in-hand goon. De straote vaan eus stad weure daan euverspeuld door kleure, geluide en geure die eus zintuige betouvere. Euveral boeste loers, zuuste lachende geziechte die de wereld ein- veur-ein e bitsje sjoender make. Titels, status en achtergroond weure vervaange door geliekheid en saamhuregheid. Mèt de Vastelaovend weure vreemde, nui vrun en vrun, femilie. Eder woord wat weurt gesproke, edere lach dee veer deile, ederen dans same maak dit momint oonvergetelek. Veer zien daan same, neet allein um te viere, meh ouch um te verbinde. Dát is veur miech deen oonvervalsde Mestreechter Vastelaovend.