Nuits

Gezeuk: Zienen Hoege Zjubilei Hoeglöstegheid vaan Groet Mestreech

17 september 2022

In ‘nen tied boe-in de baone veur ’t oprape lieke te ligke, plaotse ouch de Tempeleers ’n vakkatuur. Evels neet zoemer ein: de stadsvastelaovendsvereineging geit weer op zeuk nao De Groeten Oonbekinde. Dit jaor is dat extra bezunder, want de Tempeleers bestoon mer leefs 7x11 jaor (+100 jaar Momus). D’n oetgeleze kandidaot zal daan ouch de historie ingoon es Zienen Hoege Zjubilei Hoeglöstegheid vaan Groet Mestreech.

Veur e hopelek volledeg vastelaovendsezoen weurt deeginnege gezeuk dee mèt belump en vaste hand ‘t vastelaovendvierend volk vaan Mestreech kin veurgoon. De kandidaot moot ’t vastelaovendsblood in de aojers höbbe, euver sterke sociaol kwaliteite en Mestreechter geis besjikke, hier en meister zien in ’t Mestreechs dialek en netuurlek kinne fungere es boogbeeld veur ’t volk bij activiteite mèt de lach en de traon.

Wie gebrukelek is ’t neet de bedoeling tot kandidaote zelf reagere. ’t Volk kin kandidaote veurdrage die zie gesjik achte veur de sjoenste tijdeleke baon vaan Mestreech. Aonmelle kin veur 1 november 2022 via ’t aonmellingsformuleer op de website vaan de Tempeleers.

Oetbelder Armand Peereboom rekent ouch dit jaor weer op väöl aonmellinge. “’t Sjoene aon ’t prinsesjap is tot ’t volk ’n groete stum heet. Daoveur mote veer wel weite wee de Mestreechtenere gesjik achte veur ’t stadsprinsesjap. Wie mie kandidaote, wie mie käös veer höbbe in euze zeuktoch. Dus twiefel neet, en sjrief. De vakkatuur is jummers uters populair.”

‘t Formuleer kint geer vaanaof vendaog hei downloade.

Trök nao 't euverziech