Nuits

Carnevalsactiviteite in Mestreech goon neet door

19 oktober 2020 Coronavirus 1584278198

Geine Stadsprins, gei insjete vaan de Vastelaovend, gei Mooswief optakele, gein optochte, gei hermeniekesconcours en gein sleting vaan carneval op 14, 15 en 16 fibberwarie 2021.

Dit alles heet netuurlek te make mèt de oontwikkelinge roontelum ‘t coronavirus. Mèt pijn in ‘t hart, meh mèt alle bezej veur de umstandeghede (volksgezoondheid geit jummers veur plezeer) heet Stadscarnevalsvereineging de Tempeleers dit beslote. De discussie euver Vastelaovend 2021 leep al e tiedsje, recent is -mede op basis vaan de oontwikkeling vaan ’t virus- de knoup doorgehak. De Tempeleers volge daomèt ‘t besluut vaanoet de Veilegheidsregio, die lès alle vergönningpliechtege carmevalseveneminte verbooj. “Oet respec veur alle getroffe lui, kraanke, naobestaonde, lui in de zörg, getroffe bedrieve en organisaties, is ‘t neet langer opportuun um eveneminte roontelum ‘t thema Vastelaovend te organisere”, zeet de president vaan de Mestreechter Vastelaovend Bastiaan Klomp.” V’r höbbe lang geloerd of v’r door kóste goon mèt beveurbeeld ‘t oetrope vaan ‘nen Hoegen Hoeglöstegheid veur Groet Mestreech; veural umtot dee ’n kemissie vaan hoop zouw kinne oetstraole, meh in essentie is de Stadsprins netuurlek de spèl in ‘t kolderiek speul roontelum Carneval en is heer symbool vaan plezeer. Zjus um die lèste reie vinde v’r ‘t neet gepas um hei koumend sezoen invölling aon te geve”.

Koumend jaor ‘Sjariteit’ en minder ‘Plezeer’

‘t Devies vaan de Tempeleers is sinds jaor en daag ‘Plezeer en Sjariteit’. Door de aofgelasting vaan de eveneminte en activiteite op de drei daog zelf is dao minder ruimte veur ‘plezeer’. De Tempeleers goon daorum op zeuk um mie invölling te geve aon ‘Sjariteit’ in d’n aonloup nao de drei oersprunkeleke carnevalsdaog. “Zjus in dizzen tied höbbe lui volgens us behoofte aon aofleiing, e luusterend oer, ‘ne spreekwoordeleke ‘knoevel’ en e bitsje hoop riechting touwkoms. Eigelek alle illeminte die de Mestreecher Vastelaovend zoe kinmerke. V’r vinde ‘t eus taak um de lui zjus in dizze lestegen tied dat geveul toch te geve”, zeet Bastiaan Klomp. Dit alles moot in de weke veuraofgaond aon carneval gebäöre, al is ‘t mèt ‘n aofgeslaank program en (meugelek) neet fysiek en dit doen v’r in gooj samewèrking mèt versjèllende carnevalsvereineginge in de stad.

Trök naor 't euverziech