Nuits

André Rieu dirizjeert Zate Hermeniekes

10 fibberwarie 2020 Andre Rieu

't Samespeul vaan Zate Hermeniekes op 't Vriethof op carnevalsdinsdag krijg 'ne wel hiel bezunderen dirizjent. André Rieu heet ziech bereid verklaord de hermeniekes te dirizjere bij 't speule vaan 't ‘Mestreechs Volksleed’ veur stadsprins Luc II, 'n traditie die dit jaor nui leve ingebloze krijg. Meh veurtot heer dat geit doen, geit André Rieu iers good rippetere mèt alle Zate Hermeniekes op 'n leuke carnevalistische meneer.

Rieu krijg ouch neet de minste secundante. Gouverneur Theo Bovens en börgemeisterse Annemarie Penn-te Strake, op dat momint euvereges ambteloes börgers en speulende leie vaan respectievelek ‘Sous Bras Band Tête de Veau’ en zate hermenie ‘D'n Dreuvege vaan ’t Pleinsje’, zalle de Mestreechse wereldarties (muzikaol) oondersteune. Oetbelder Odin Wijnhoven: “V'r zien netuurlek oontzettend gruuts tot heer eus hermeniekes geit dirizjere bij dees hernuide traditie. Daomèt krijg de nui invölling vaan 't middagprogram op Vastelaovendsdinsdag 'n mie daan passend slot. En daoneve is 't e groets gebaar nao eus hermeniekes boe v'r allemaol zier daankbaar veur zien.”

Mèt 't samespeul op 't Vriethof weurt “d’n daag vaan 't Zate Hermenieke”, wie carnevalsdinsdag is geduip, aofgeslote. De hermeniekes starte deen daag bij 't mónnumint vaan Han van Wetering op 't Vriethof, boe 't “hermenieke vaan verdeenste” weurt oetgerope. Nao 'n oontbijt trèkke ze langs ach versjèllende podia in de stad. Dees samewèrking tösse Tempeleers, aajd-stadsprins Armand Peereboom, gemeinte en horeca vörmp de nui invölling vaan 't Zate Hermeniekes concours. De gezameleke aofsleting op 't Vriethof is 't slotstök vaan d'n daag. André Rieu liet wete verierd te zien mèt ’t verzeuk: “Hermeniekes hure bij de Mestreechter Vastelaovend, dee zoe gereump weurt vaanwege de bezunder muzikaol invölling. Zelf geneet iech ouch vaan de hermeniekes in mien thoesstad. Dat iech hun noe zoe maag dirizjere, is veur miech bezunder.”

Trök naor 't euverziech