7x11 jaor Stadsvastelaovendsvereineging De Tempeleers
30 juni 2022
Leef vastelaovendsvrun,
Es echte leefhöbbers vaan deen oonvervalste Mestreechter Vastelaovend wèt geer es geine aandere tot eder vastelaovendssezoen uniek is.
D’n eine kier sniet ’t en mote veer us drei laoge kleier euverein doen um de kaw te trotsere, d’n aandere kier steit d’r zoe’ne stevege wind tot veer bekans vaan de aw brögk aof wejje mèt de Groeten Optoch of sjijnt ’t zönneke zoe hel tot eus de schminck bekans devaan oetlöp.
D’n eine kier höbbe veer ‘ne get röstegere Stadsprins dee us veurgeit en d’n aandere kier eine dee bekans oet zien vel springk.
Eder sezoen heet zien eige charme en is wie daan ouch uniek!
Toch weurt koumend sezoen extra bezunder, want daan viere veer tot veer es Stadsvastelaovendsvereineging al 7x11 jaor ’t organiserend kader mage vörme dat, same mèt ’t vastelaovendvierend volk, kleur en invölling gief aon ’t köstelek speul vaan deen oonvervalste Mestreechter Vastelaovend.
77 jaor ‘plezeer en sjariteit’ is netuurlek get wat veer neet zoe mer veurbij laote goon, dat wèlle veer gere same mèt uuch gruuts viere!
Tösse 11 en 21 november aonstaonde zalle tal vaan fiesteleke activiteite weure georganiseerd
boe-in veer neet allein stèlstoon bij ‘t 77-jaoreg zjubelei vaan de Tempeleers, meh ouch 't 100-jaoreg bestoon vaan de Momus Sosjeteit, boe-oet de Tempeleers in 1945 oontstande zien.
Mie info dao-euver volg al gaw, meh veer griepe gere dit momint alvas aon um uuch te attendere op dees unieke periood.
Bij e zjubeleijaor huurt netuurlek ouch e bijpassend logo wat veer in al eus communicatie zalle touwpasse. Umtot geer ’n belaankrieke rol späölt in de Mestreechter Vastelaovend, vinde veer ’t sjiek um bijgaond dit nuie logo es ierste aon uuch kinbaar te make.
Zèt uuch dus alvas de nudege kruiskes in eure kallepin, want ’t weure ech ’n aontal sjieke eveneminte mèt veur eder get wèls!