Naomes de ministeries vaan geannonceerde- en notificeerde zakes, langloupende zakes en energieke zakes:
Op dees veur Mestreech zier importanten daag in ’t vreuge veurjaor vaan 2000 plus twie kier èlf plus drei, make veurneumde Ministeries mèt väöl vräög bekind tot d’n hier dee wierdeg is bevoonde um Mestreech veur te goon in de zwoer meh plezerege daog vaan Vastelaovend vaanaof noe gekind zal zien es:
Carlo I, Stadsprins vaan Groet Mestreech. Mèt belump en vaste hand zal heer Mestreech op oonnaovolgbaar wijs veurgoon in de vegilie vaan en de heerleke daog vaan Vastelaovend zelf.
| STADSPRINS CARLO D’N IERSTE Pensio Processus Procuratorus – Mosae Linguaticus – Scribentus Baron vaan de Hoogenweerth Graof vaan Walburgia Minesteriaol vaan Veldeke Prinselek Naozaot per in legibus vaan Stadsprins They d’n Twiede Lienhier vaan de Mestreechter Dictionair Chef de Cuisine mèt Staar vaan Nate en Druge Tete de Veau Opper-Dabbeleer in gehoutwörmde Vastelaovendszake Groet-Adviseur vaan Prinseleke Liefleedsjes Emiritus-Kwakvors vaan CV de Kikkers Drappocommandant vaan alle Zate Hermeniekes Protecteur vaan de Mestreechter Vastelaovend |
Euze Stadsprins, in ’t börgerleve Carlo Schrijnemaekers, is 41 jaor joonk. Heer is getrouwd mèt zien leeftallege Prinses Anouk Schrijnemaekers-Bovens (40 jaor joonk). Zie woene mèt hun döchterke Annalou (6 jaor) aon Achter de Hoven in Amie. Dao is heer, nao iers aon de Iepenhoven gewoend te höbbe, terech gekoume nao umzwervinge via Malberg (Praktizijnsruwe), Heugem (Papaverweerd) en ’t centrum (Hoonderstraot).
Veur zien studie heet Zienen Hoegen Hoeglöstegheid, nao de apekeutelesjaol Anne Frank in Heugem, hiel lang nao de beuk gekeke op ’t Sint Maartenscollege. Daonao is heer ziech goon bezinne op zien wijere wèrkende leve aon de Hoegsjaol Zuyd, boe heer HEAO Commerciële Economie heet gestudeerd en zelfs heet aofgerund.
Via versjèllende umzwervinge (oonder mie ABN AMRO, Vodafone en Precedence) is Zienen Hoegen Hoeglöstegheid inkel maonde geleie in deens getrooje bij pensioenoetveurder APG boe heer es procesmanager de pensioene mèt ingewikkelde formules perbeert hoeger te kriege.
Euzen hoeglöstegheid is ‘nen echte Mestreechteneer. Op sociaol-maotsjappelek vlak maak heer ziech mie es verdeenstelek veur Veldeke Mestreech boe heer veurzitter vaan is en oonder mie jaorleks ’t Groet Mestreechs Dictee prizzenteert. Daoneve is heer al jaore ein vaan de kaartrekkers es börgermètwerker vaan de PR- en arzjiefkemissie vaan de Tempeleers. En is heer lid vaan de selectiekemissie en vakjury vaan ‘t Mestreechs Vastelaovendsleedsjeskonkoer.
In ’t verleie waor heer actief binne Zate Hermenie Naat en Druug en Sous Bras Band Tete de Veau. Op sportief vlak deit ZHH aoventouw zien rensjeun aon.